वीरगन्ज । भारतबाट ल्याईएको प्रतिबन्धित पटाकाहरु जिल्ला प्रहरी कार्यालय पर्साले बरामद गरेर नष्ट गरेको छ । दीपावली र छठ पर्वलाई लक्षित पर्सा प्रहरीले गरेकोको चेकजाँचका क्रममा १२ लाख मूल्य बराबरका प्रतिबन्धित पटाका तथा आतिसबाजीका सामान बरामद गरी नष्ट गरेको हो ।
विभिन्न स्थानमा खटिएका प्रहरी टोलीहरूले चेकजाँचका क्रममा बरामद गरेका ती पटाका सामग्रीहरू शुक्रबार बिहान कार्यालय परिसरमै स्थानीय जनप्रतिनिधि र सञ्चारकर्मीहरूको उपस्थितिमा नष्ट गरिएको सूचना अधिकारी प्रहरी नायव उपरीक्षक हरि बहादुर बस्नेतले जानकारी दिए ।
प्रहरीका अनुसार पछिल्लो समयमा सीमाक्षेत्र हुँदै अवैध रूपमा पटाका भित्र्याउने, बिक्री–वितरण गर्ने र प्रयोग गर्ने गतिविधि बढेको देखिएकाले प्रहरी सक्रिय रूपमा नियन्त्रणमा जुटेको छ।
प्रवक्ता तथा सूचना अधिकारी प्रहरी नायब उपरीक्षक बस्नेतले भने, “अवैध पटाकाको प्रयोगले आगलागी, घाइते हुने घटना र जनधनको क्षति हुने सम्भावना उच्च हुन्छ। त्यसैले यस अभियानमार्फत हामीले बजार र सीमाक्षेत्रमा कडाइ गरेका छौं।”
बस्नेतका अनुसार प्रहरीले यस वर्ष पनि ‘सुरक्षित चाड, सजग नागरिक’ भन्ने नारासहित अवैध पटाकाविरुद्ध विशेष निगरानी अभियान सञ्चालन गरिरहेको छ। प्रहरीले सर्वसाधारणलाई चाडपर्वको समयमा सुरक्षा सचेत रहँदै उत्सव मनाउन अपिल गरेको छ।
