रञ्जित पाण्डेय
असोज । जिल्ला प्रहरी कार्यालय बाराले आयोजना गरेको कार्यक्रममा ७१ जनाले रक्तदान गरेका छन् । ७० औं प्रहरी दिवस–२०८२ को अवसरमा जिल्ला प्रहरी कार्यालय बाराले बिहीबार बिहान रक्तदान कार्यक्रम सम्पन्न गरेको हो ।
जिल्ला प्रहरी कार्यालय बाराको प्राङ्गणमा आयोजित उक्त रक्तदान कार्यक्रममा बाराका प्रहरी प्रमुख प्रहरी उपरीक्षक सन्तोष तामाङ, प्रहरी नायब उपरीक्षक विजय राज पण्डित सहित ७१ जना प्रहरी कर्मचारीहरूले स्वेच्छिक रक्तदान गरेका छन्।
रक्तदान कार्यक्रमलाई सम्बोधन गर्दै प्रहरी उपरीक्षक तामाङले भने, “नेपाल प्रहरी केवल अपराध नियन्त्रण र शान्ति सुरक्षामै सीमित छैन, हाम्रो उद्देश्य समाजप्रति उत्तरदायी सेवा पुर्याउनु पनि हो। रक्तदानजस्तो मानवसेवामूलक कार्यले प्रहरी र जनताबीचको विश्वास र सम्बन्ध अझ गाढा बनाउँछ।”
उक्त कार्यक्रम जिल्ला प्रहरी कार्यालय बाराको आयोजनामा तथा प्रादेशिक अस्पताल कलैयाको रक्त संचार शाखाको प्राविधिक सहकार्यमा सम्पन्न भएको हो।
रक्तदानमा सहभागी भएका प्रहरी कर्मचारीहरूले नियमित ड्युटीका बीच समाज र जनताको जीवनरक्षामा योगदान दिन पाउँदा गर्वको अनुभव भएको बताएका छन्।
प्रहरी दिवसको अवसरमा सञ्चालन भएको यो कार्यक्रमले प्रहरी संगठनलाई “सेवा, सुरक्षा र सहयोग” को भावनासँग जोड्दै प्रहरी र समुदायबीच सहकार्य र विश्वासको सम्बन्ध अझ बलियो बनाएको जनाइएको छ।
“जनताको सेवा र सुरक्षामा समर्पित प्रहरी” भन्ने मूल नारालाई आत्मसात गर्दै नेपाल प्रहरी बाराले यस कार्यक्रममार्फत समाजमा आफ्नो मानवीय दायित्व र सामाजिक उत्तरदायित्वको उदाहरण प्रस्तुत गरेको छ।
