वीरगन्ज । औषधी उत्पादक संघले वीरगंज महानगरलाई कम्प्युटर र प्रिन्टर सहयोग गरेको छ । जेन्जी आन्दोलनका क्रममा भएको लुटपाट, तोडफोड र आगजनीका कारण पूर्ण रूपमा क्षतिग्रस्त बनेको वीरगंज महानगरपालिकाको दैनिक कार्यसम्पादनमा सहजता ल्याउनका लागि १० थान कम्प्युटर र चारथान प्रिन्टर सहयोग गरेको हो ।
औषधि उत्पादक संघले आफ्नो सामाजिक उत्तरदायित्व (ऋक्च्) अन्तर्गत महानगरपालिकालाई १० थान कम्प्युटर सेट (युपिएससहित) र चार थान प्रिन्टर हस्तान्तरण गरेको संघका बरिष्ठ उपाध्यक्ष प्रभात रुंगटाले जानकारी दिए ।
गत भदौ २४ गतेको आन्दोलनमा महानगर भवनसहित सम्पूर्ण फर्निचर, कागजात र सूचना–प्रविधि उपकरणहरू जलेर नष्ट भएपछि महानगरको दैनिक प्रशासनिक कामकाजमा समेत प्रभावित हुदै आएको छ ।
सामग्री हस्तान्तरण कार्यक्रममा बोल्दै वीरगंज महानगरपालिकाका प्रमुख राजेशमान सिंहले विषम परिस्थिति र असहज अवस्थामा औषधी उत्पादक संघले गरेको सहयोगले महानगरको दैनिक प्रशासनिक काममा नागरिकलाई सहयोग पुग्ने बताए ।
औषधि उत्पादक संघका वरिष्ठ उपाध्यक्ष प्रभात रुंगटाले कठिन परिस्थितिमा महानगरको पुनःनिर्माणमा साथ दिन पाउनु गौरवको विषय भएको उल्लेख गरे ।
सहयोग सामग्री हस्तान्तरण कार्यक्रममा महानगरका प्रमुख प्रशासकीय अधिकृत अरविन्द लाल कर्ण, संघका पदाधिकारी विनित लोहिया, विनय काब्रा, सर्वाेत्तम गिरी र उमेश श्रेष्ठ लगायतको उपस्थिति रहेको थियो । यसअघि सूर्य नेपालले पनि महानगरलाई कम्प्युटर, ल्यापटप र प्रिन्टर लगायतका सामग्री उपलब्ध गराएको थियो ।
