वीरगन्ज । लोकतान्त्रिक समाजवादी पार्टी नेपाल (लोसपा) जिल्ला कार्य समिति बाराको शनिबारकार्यकर्ता भेटघाट कार्यक्रम सम्पन्न भएको छ। जेनजी आन्दोलनपछि देशको बदलिँदो राजनीतिक परिस्थिति र मधेस प्रदेशमा नयाँ सरकार गठनको सन्दर्भलाई ध्यानमा राख्दै कलैयामा कार्यक्रम आयोजना गरिएको हो।
कार्यक्रमलाई सम्बोधन गर्दै लोसपा नेपालका केन्द्रीय अध्यक्ष तथा पूर्वउपप्रधानमन्त्री महन्त ठाकुरले मधेसको अधिकार, स्वाभिमान र समृद्धिका लागि लोसपा नेपाल निरन्तर अग्रसर रहने र वर्तमान राजनीतिक परिस्थितिमा जनताको हितका पक्षमा सशक्त भूमिका खेल्ने प्रतिबद्धता जनाए । उनले जनताका मुद्दा र मधेसको माग पूरा गर्न पार्टी एकजुट भएर अघि बढ्ने बताए ।
त्यसैगरी, प्रदेश अध्यक्ष जितेन्द्र सोनलले मधेस प्रदेशमा नयाँ सरकार गठनसँगै जनताको पक्षमा नीति निर्माण र कार्यान्वयनमा लोसपाको योगदान निर्णायक हुने उल्लेख गर्दै संगठन सुदृढीकरणका लागि तल तहसम्म पार्टी सक्रिय रहनुपर्ने बताए ।
कार्यक्रममा सहभागी कार्यकर्ताहरूले पनि पार्टीको नीति–कार्यक्रम जनतामाझ पुर्याउने, संगठन विस्तारमा योगदान गर्ने र आगामी राजनीतिक यात्रामा लोसपालाई अझ मजबुत बनाउन सक्रिय भूमिका निर्वाह गर्ने प्रतिबद्धता जनाएका थिए।
कार्यक्रम अन्त्यमा पार्टीका स्थानीय नेताहरूले हालको राजनीतिक अवस्थाले मधेसको अधिकार र हितमाथि असर पार्न नदिन एकजुट भई अघि बढ्ने निर्णयसमेत गरेका छन्।
