वीरगन्ज । पर्सा प्रहरीले मानव बेचबिखन तथा ओसारपसार कार्यमा संलग्न रहेको आरोपमा एकजना पुरुषलाई पक्राउ गरेको छ।
पक्राउ पर्नेमा पर्सा जिल्ला सखुवा प्रसौनी गाउँपालिका वडा नं. ५ का २५ वर्षीय हिरा माझी रहेका छन्।
पर्सा प्रहरीका अनुसार, माझीले काठमाडौंबाट वीरगन्ज ल्याइएकी एक १४ वर्षीया किशोरीलाई भारतको दिल्लीमा लगी काम लगाइदिने र विवाह गर्नेसमेत प्रलोभन देखाएका थिए।
उनीहरू वीरगन्ज महानगरपालिका वडा नं. १६ स्थित शंकराचार्य गेटको सडकखण्डमा भारततर्फ जाँदै गर्दा प्रहरी चेकिङ टोलीले फेला पारेको थियो। प्रहरीले किशोरीको सकुशल उद्धार गरी माझीलाई नियन्त्रणमा लिएको छ।
जिल्ला प्रहरी कार्यालय पर्सामा ल्याइएका माझीविरुद्ध मानव बेचबिखन तथा ओसारपसारसम्बन्धी कसूरमा मुद्दा चलाइएको छ। जिल्ला अदालत पर्साबाट सात दिनको म्याद थप गरी घटनाबारे थप अनुसन्धान भइरहेको प्रहरीले जनाएको छ।
