रञ्जित पाण्डेय
वीरगन्ज । बारा जिल्लाको परवानीपुर गाउँपालिका वडा नम्बर–१ मा रहेको बुनियाद प्रहरी चौकीको भवन अत्यन्तै जीर्ण अवस्थामा पुगेको छ। पुरानो वडा कार्यालयको भवनमा सञ्चालित यो प्रहरी चौकी सुरक्षा र मानवीय बसोबास दुवैका लागि अनुपयुक्त देखिएको छ।
चौकीको भवनको भित्तामा रङ खुइलिएको, इँटाहरू खुल्ला रहेको र छानाबाट पानी चुहिने समस्याले गर्दा त्यहाँ कार्यरत प्रहरी जवानहरूले असहज वातावरणमा काम गरिरहेका छन्। खानपिन र बस्नका लागि समेत उचित व्यवस्था नभएको सो भवनमा बर्षायाममा स्थिति झनै दयनीय बन्ने गरेको छ। छतबाट पानी चुहिने, कोठाहरूमा पानी जम्ने र झिंगाले प्रहरी जवानहरूलाई थप सास्ती दिइरहेको छ।
स्थानीय सरकारलाई पटकपटक जानकारी गराउँदा पनि हालसम्म समस्या समाधानका लागि कुनै पहल नगरिएको गुनासो गरिएको छ। प्रहरीको यो असहज अवस्थाप्रति सरोकारवाला निकायको मौनतालाई दुःखद मानिएको छ।
स्थानीय नागरिकहरूले प्रहरी चौकीको अवस्था सुधार्नका लागि गाउँपालिकामा धेरैपटक गुनासो गरे पनि कुनै सुनुवाइ नभएको बताएका छन्। उनीहरूका अनुसार, प्रहरी चौकी सुरक्षाको आधार भएकाले त्यहाँ कार्यरत जवानहरूलाई सुरक्षित र स्वस्थ वातावरण दिनु सरकारको जिम्मेवारी हो।
यदि स्थानीय निकायबाट चौकीको नयाँ भवन निर्माण वा मर्मत सम्भारको योजना नबनाइएमा यो स्थिति झनै जटिल बन्ने देखिन्छ। प्रहरी जस्तो संवेदनशील सेवा प्रदान गर्ने निकायको अवस्था सुधार्न सम्बन्धित निकायहरू गम्भीर बन्नुपर्ने आवश्यकता देखिएको छ।
