काठमाडौं । विद्युत वितरण प्रसारणमा समस्या देखिएपछि नेपाल विद्युत प्राधिकरणका कार्यकारी निर्देशक हितेन्द्रदेव शाक्यले प्रणाली सञ्चालन विभाग स्विचाटारको आकस्मिक निरीक्षण गरेका छन्।
प्रणालीमा समस्या देखिएपछि कार्यकारी निर्देशक शाक्यले विभागमा प्रत्यक्ष रूपमा बसेर ढल्केबर ग्रिड महाशाखाका प्रमुख विनोद लोहनीलाई निर्देशन दिँदै समस्या समाधानका लागि अग्रसरता लिएका हुन्।
भारतबाट नेपालमा हाल बिजुली आयात भइरहेको ४०० केभी ढल्केबर मुजफरपुर लाइनमा भारततर्फ आएको समस्याका कारण पटकपटक विद्युत अवरुद्ध भइरहेको छ। प्राधिकरणले यसलाई विशुद्ध प्राविधिक समस्या भएको र लोडसेडिङसँग जोड्न नमिल्ने जनाएको छ।
आजै तीन पटकसम्म प्रसारण अवरुद्ध भएको थियो। पहिलोपटक साँझ साढे ६ बजेतिर अवरुद्ध भएको बिजुली करिब एक घण्टापछि आएको थियो। करिब ८ बजे पुनः आएको बिजुली १५ मिनेटपछि फेरि अवरुद्ध भएको छ। यसबाट काठमाडौंसहित देशको अधिकांश जनजीवन प्रभावित बनेको छ।
