मकवानपुर । मकवानपुरको राक्सिराङ गाउँपालिका–९ अठारेस्थित भित्री सडकखण्डमा आज बिहान बोलेरो जिप दुर्घटना हुँदा ९ जना घाइते भएका छन्। प्रहरीका अनुसार घाइतेमध्ये ६ जनाको अवस्था गम्भीर छ।
प्रहरी प्रवक्ता डिएसपी श्यामु अर्यालले दिएको जानकारी अनुसार, राक्सिराङको खैराङबाट मनहरीतर्फ आउँदै गरेको बा १५ च १३३३ नम्बरको बोलेरो जिप बिहान करिब ८ः१५ बजे अनियन्त्रित भई सडकबाट करिब ५० मिटर तल खसेको थियो।
इलाका प्रहरी कार्यालय कान्द्राङबाट प्रहरी निरीक्षक भरत कुमार खड्काको नेतृत्वमा गएको प्रहरी टोलीले घाइतेहरूको उद्धार गरी मनहरि अस्पताल पठाएको छ। मकवानपुर प्रहरीका अनुसार बोलेरोमा चालकसहित ९ जना सवार थिए।
प्रहरीले जनाए अनुसार, राक्सिराङ ९ का १६ वर्षीय हिमाल बस्नेत, ३५ वर्षीय बुद्धिमान घलान, ७५ वर्षीय डिल ब. घलान, ६५ वर्षीया फूलमाया घलान, ३८ वर्षीय रूपबहादुर राउत र ४८ वर्षीय दीपक खड्का गम्भीर घाइते भएका छन्। उनीहरूको टाउको तथा शरीरका विभिन्न भागमा चोट लागेको छ।
यसैगरी ५० वर्षीय सूर्य अधिकारी, १४ वर्षीय कुमार तामाङ र २८ वर्षीय सुजन तामाङ पनि घाइते भएका छन् र उनीहरूको अवस्था मध्यम रहेको प्रहरी प्रवक्ता अर्यालले बताए।
