विरगंज । रातीदेखि परेको सिमसिम पानीका कारण बर्दघाट दुम्किबास खण्डको घिउखोलामा सडक चिप्लो भएपछि दाउन्ने सडकखण्ड अवरुद्ध भएको छ। आइतबार बिहानैदेखि सवारी आवागमन पूर्ण रूपमा ठप्प भएको इलाका प्रहरी कार्यालय दुम्किबासले जनाएको छ।
बुटवल नारायणघाट सडकको दाउन्ने खण्डमा राति ११ बजेदेखि बिहान ५ बजेसम्म सडक निर्माणका कारण सवारी आवागमन रोकिएको थियो। आइतबार बिहानै दुम्किबास क्षेत्रको घिउखोलामा बाटो चिप्लो हुँदा सानाठूला कुनै पनि सवारी साधन चल्न सकेका छैनन्।
सडकको माथिल्लो माटोको तह हटाएर सवारी संचालनको प्रयास भए पनि लगातारको सिमसिम पानीले सवारी चल्न सकेको छैन। दुम्किबासबाट दाउन्नेतर्फ आउने सवारी उकालो चढ्न नसकेर दुम्किबास ज्यामिरे खण्डमा रोकिएका छन् भने बर्दघाटबाट जाने सवारी ओरालोमा चिप्लिएर दुर्घटना हुन सक्ने खतराका कारण बर्दघाट क्षेत्रमै रोकिएका छन्।
सामान्य वर्षा हुँदा पनि सवारी संचालनमा समस्या हुने दाउन्ने सडकखण्डमा यात्रुवाहक र मालवाहक सवारीहरू घण्टौँ जाममा पर्ने गरेका छन्।
