आनन्द साह
वीरगन्ज । नेतृत्व विकास र व्यवस्थापन तालिममा केन्द्रीत ‘लिडरशिप डेभलपमेन्ट इन्स्टिच्युट अफ नेपाल (एलडीआई) नेपाल आजदेखि औपचारिक रूपमा वीरगंजमा सञ्चालनमा आएको छ।
वीरगन्ज महानगरपालिका वडा नम्बर १२ मूरलीमा संस्थाको औपचारिक उद्घाटन नेपाल उद्योग वाणिज्य महासंघ मधेश प्रदेशका अध्यक्ष अशोक टेमानीले गरेका थिए । एलडआई नेपालका संस्थापक तथा प्रमुख कार्यकारी अधिकृत अनिल जयसवालले संस्थाले युवा, व्यावसायी र उद्यमीहरूलाई लक्षित गर्दै नेतृत्व, व्यवस्थापन तथा व्यावसायिक सीप अभिवृद्धिमा सहयोग पुर्याउने लक्ष्य लिएको जानकारी दिए ।
उनका अनुसार, संस्थाले विभिन्न तालिम, कार्यशाला तथा परामर्श कार्यक्रमहरू सञ्चालन गर्नेछ, जसले सहभागीहरूको व्यवहारिक क्षमता, रणनीतिक सोच र व्यक्तित्व विकासमा टेवा पुर्याउनेछ।
कार्यक्रमका प्रमुख अतिथि अशोक टेमानीले संस्थाले युवाहरूमा नेतृत्व र व्यवस्थापन क्षमताको विकास गर्दै समाजलाई सशक्त बनाउन सक्ने विश्वास व्यक्त गरे ।
उदघाटन समारोहमा स्थानीय व्यापारी, व्यावसायी, समाजसेवी तथा युवाहरूको उल्लेख्य उपस्थिति थियो। सहभागीहरूका अनुसार, यो संस्थाको स्थापना वीरगंजमा नेतृत्व विकासको नयाँ अध्यायको सुरुवात हो।
क्षेत्रीय विकास र मानव संसाधन सशक्तिकरणतर्फ यसको सकारात्मक पहलका रूपमा सरोकरवालाहरुले लिएका छन् । यस्ता संस्थाहरुको स्थापनाले देशमा आवश्यक योग्य र दक्ष नेतृत्वको आपूर्ति हुने पनि विश्वास गरिएको छ ।
