बारा । मधेश प्रदेश सरकारद्वारा निर्माणाधीन फेटा गाउँपालिका वडा नम्बर–१, भलुही चोकदेखि भर्वलिया हुँदै नहरसम्म पुग्ने सडक निर्माण कार्य गुणस्तरहीन र मनोमानी ढंगले भइरहेको स्थानीयले गुनासो गरेका छन्।
पाँच वर्षअघि नै सम्पन्न हुनुपर्ने यो सडकको काममा ढिलाइ भए पनि हाल भइरहेको कामको तौरतरिकाप्रति स्थानीयले गम्भीर प्रश्न उठाएका छन्।
स्थानीय बासिन्दा समेत रहेका ठाकुरराम बहुमुखी क्याम्पसका प्राध्यापक विरेन्द्र प्रसाद साहका अनुसार सडक निर्माण गर्दा पानीको निकासको उचित व्यवस्थापन गरिएको छैन।
विगतदेखि पानी कसरी निकास हुँदै आएको थियो भन्ने एकिन नगरी, रेखाङ्कन नगरी र त्यसको व्यवस्थापन नगरी काम अघि बढाइएको छ। कालोपत्रे गर्ने तयारी भइरहेको यो सडकको नाप, नक्शा र रेखाङ्कन विधि र पद्धतिसंगत नगरिएको उनको आरोप छ।
केही व्यक्तिको लहडमा सार्वजनिक र निजी जग्गा नछुट्याई मनोमानी ढंगले काम गर्दा थोरै पानी पर्दा पनि सडकमा डुबान भएको स्थानीयले बताएका छन्। करिब ३०/४० मिटर उत्तर बाउबाजेको पालादेखि रहेको काठको नाली पुरिएको छ।
५० औँ वर्षदेखि पानी निकासका लागि प्रयोग भइरहेको यो सामान्य कुरामा पनि प्राविधिक कर्मचारीको ध्यान नपुगेकोमा स्थानीयले आश्चर्य व्यक्त गरेका छन्।
त्यसैगरी, प्राध्यापक साहकै निजी जग्गा मिचिएपछि जिल्ला पूर्वाधार कार्यालय बारा, कलैयामा निवेदन दिए पनि कुनै कारबाही नभएको गुनासो छ। यस्तो अवस्थामा न्याय कहाँ र कसरी पाउने भन्ने प्रश्न गर्दै उनले राज्य र नागरिकको करको रकम दुरुपयोग भइरहेको बताए।
पानीको निकास थुनेर बनाइएको सडक दिर्घकालिन नहुने र यसै वर्षको वर्षाले बगाउने उनको चिन्ता छ। स्थानीय बासिन्दाले निर्माणपछि पछुताउनुभन्दा अहिले नै नाप, नक्शा र रेखाङ्कन गरी गुणस्तरीय निर्माण कार्य सम्पन्न गर्न मधेश प्रदेश सरकार र सम्बन्धित निकायलाई हार्दिक अपिल गरेका छन्।
तर, पूर्वाधार विकास कार्यालय बाराकी इञ्जिनियर आरती चौधरीले नाप नक्सा नगरी मिचिएको जग्गामा सडक नबनाएको दावी गर्छिन् । उनले स्थानीय जनप्रतिनिधिको रोहबरमै सडकको जग्गा नाप नक्सा गरेर निर्माण गरिएको जिकिर गर्दै यस विषयमा स्थानीयले अनावश्यक विवाद गर्न खोजेको बताईन् । प्रदेश सरकारको बजेटमा निर्माण हुन लागेको चार किलोमिटर सडकको नाला निकालिएको छैन ।
नाला ननिकाली सडक बनाउँदा पछि फेरी नाला खन्ने समयमा सडक भत्किन सक्ने जोखिमहरु हुन्छन् । यस विषयमा पूर्वाधार विकास कार्यालयकी इञ्जिनियर चौधरीले प्रदेश सरकारबाट आएको बजेटक सिलिङ र परिभाषित क्षेत्र बाहेक अन्य कुनै शीर्षकमा बजेट नरहेको बताईन् । यसरी प्रदेश सरकारले सडक र नाला सगँसगँै निर्माण नगर्दा राज्यको दोहोरो आर्थिक भार व्यय हुने देखिन्छ ।
