काठमाडौं । प्रमुख प्रतिपक्षी दल नेकपा माओवादी केन्द्रका उपमहासचिव एवं सांसद वर्षमान पुन ‘अनन्त’ले प्रधानमन्त्रीको बेडरुमभित्र बिचौलिया पुगेको अभिव्यक्ति दिएकोमा नेपाली कांग्रेसका महामन्त्री गगन कुमार थापालाई धन्यवाद दिएका छन् ।
शुक्रबार प्रतिनिधि सभा बैठकमा पार्टीको तर्फबाट सम्बोधन गर्दै पुनले थापालाई धन्यवाद दिएका हुन् ।
महामन्त्री थापाले गत वैशाख २ गते काठमाडौंमा आयोजित एक कार्यक्रमलाई सम्बोधन गर्ने क्रममा प्रधानमन्त्रीको बेडरुमसम्म बिचौलिया पुग्ने गरेको दाबी गरेका थिए ।
पुनले भने–‘सत्तारुढ पार्टीका शक्तिशाली महामन्त्री र सरकार सञ्चालन गर्ने संयन्त्रका सदस्यले नै विचौलियाको पहुँच प्रधानमन्त्रीको बेडरुमसम्मै छ भन्नुभयो । ढिलै भए पनि सत्य बोल्नु भएकोमा उहाँलाई धन्यवाद भन्न चाहन्छु ।’
उनले यही कुरा आफूहरूले भन्दा सरकारबाट हट्दाको छटपटि भनिएको बताउँदै अहिले घरघर र सार्वजनिक मञ्चमा पनि विचौलिया र स्वार्थ समूहको सरकार भनिरहेको बताए ।
उनले भने–‘हामीले यो सरकारले विचौलिया समूहको स्वार्थमा काम गरिरहेको छ भन्दा सरकारबाट हट्दाको छटपटि भनियो । आज हामीले मात्रै होइन, घरघरमा, सार्वजनिक मञ्चमा र सबैतिर यो सरकारलाई विचौलिया, दलाल र स्वार्थ समूहको सरकार भनिरहेका छन् ।’
