काठमाडौं । काठमाडौंको शंखरापुर नगरपालिका–९ सानागाउँमा आइतबार राति एक महिलाको हत्या भएको छ। जिल्ला प्रहरी परिसर काठमाडौंका एसपी अपिलराज बोहराका अनुसार रामेछाप खाडादेवी गाउँपालिका–७ घर भएकी पुतली घिसिङ आफ्नै डेरामा मृत फेला परेकी हुन्। उनको घाँटीमा धारिलो हतियार प्रहार भएको थियो र हतियार घटनास्थलमा फेला परेको छैन।
प्रहरीलाई पुतली र उनका दुई बच्चाहरू घाइते अवस्थामा रहेको खबर प्राप्त भएको थियो। घटनास्थलमा ११ वर्षीय रिदम घिसिङ र १० वर्षीया संजिता घिसिङ सामान्य घाइते अवस्थामा फेला परेका छन्। उनीहरूको हात र खुट्टामा चोट लागेको छ र उपचारका लागि ट्रमा सेन्टर पठाइएको छ।
ADVERTISEMENT
मृतक पुतलीका ५२ वर्षीय श्रीमान पदम घिसिङ भने घटनास्थलबाट फरार छन् र प्रहरीले उनको खोजी जारी राखेको छ। मृतकको शव त्रिवि शिक्षण अस्पताल महाराजगञ्जमा पोस्टमार्टमका लागि पठाइएको छ।
