वीरगन्ज । सशस्त्र प्रहरी बल नेपाल, प्राविधिक तालिम शिक्षालय बारा पथलैयाले आज रक्तदानको आयोजना गरेको छ । २४ औं सशस्त्र प्रहरी दिवसको अवसरमा आयोजना गरिएको रक्तदानमा १ महिला सहित ५९ जनाले रक्तदान गरेका छन् ।
रक्तदानको प्राविधिक शिक्षालयका सशस्त्र प्रहरी उपरीक्षक इञ्जिनियर सञ्जय कुमार मण्डलले रगत दान गरेर उदघाटन गरेका थिए । कार्यक्रममा सीमा गुरुङ, मदन राना, राम बहादुर राई, अनिल विक, अनुज प्रसाद चौरसिया, सविन राई, पशुपति विक लगायत ५९ जनाले रक्तदान गरेको रक्तसञ्चार केन्द्र वीरगन्जका प्राविधिक जितेन्द्र कुश्वाहले जानकारी दिए ।
बुधबार २४ औं सशस्त्र प्रहरी दिवस मनाईदै छ । सशसत्र प्रहरी दिवसको अवसरमा यसअघि १३ नम्बर गण हेडक्वार्टर पर्सा, ४० नम्बर रिजर्भ गण पिलुवा लगायतमा पनि रक्तदान कार्यक्रम सम्पन्न भएको छ ।
चिसो मौसममा अस्पतालमा उपचाररत बिरामीहरुलाई रगतको अभाव हुन नदिन मानवीय सेवामा समर्पित सशस्त्र प्रहरीले रक्तदान गरेको जनाएको छ ।
