वीरगन्ज । जम्मु कश्मीरको मुख्यमन्त्रीको रुपमा नेशनल कन्फरेन्सका नेता उमर अब्दुल्लाले शपथ लिएका छन् । हालै सम्पन्न विधानसभा निर्वाचनमा नेसनल कन्फ्रेन्स पार्टीले ९५ सिटमध्ये ४२ सिट जितेका ५४ वर्षीय अब्दुल्लाले दोस्रो पटक जम्मु कश्मीरको कमान्ड सम्हालेका छन् ।
गठबन्धनले बहुमतको आँकडा पार गरेपछि उमर अब्दुल्लालाई मुख्यमन्त्री बन्ने बाटो खुलेको हो । नेशनल कन्फ्रेन्सको सहयोगी कांग्रेसले पनि ६ सिट जितेको छ । यसअघि सन् २००९ मा उमर अब्दुल्ला कांग्रेस–एनसी गठबन्धनमा जम्मू–कश्मीरको मुख्यमन्त्री पनि थिए ।
बुधबार अब्दुल्लाले जम्मू कश्मीरको मुख्यमन्त्रीको शपथ लिए । अब्दुल्लाहसहित ६ जना विधायकले मन्त्रीको शपथ लिएका छन् । नेशनल कन्फ्रेन्सका विधायक सुरिन्दर चौधरी, सतीश शर्मा, जावेद अहमद डार, सकिना इतु, जावेद राणाले मन्त्रीको शपथ लिएका छन् ।
अब्दुल्लाको जन्म १० मार्च १९७० मा फारुक अब्दुल्ला र हजुरबुबा शेख मोहम्मद अब्दुल्लाको घरमा भएको थियो । उमरको प्रारम्भिक शिक्षा श्रीनगरको बर्न्ट हल स्कुलमा भएको थियो । त्यसपछि उनले हिमाचल प्रदेशको सनावरको लरेन्स स्कुलमा अध्ययन गरे ।
उमरले मुम्बईको सिडेनह्याम कलेजबाट वाणिज्यमा स्नातक डिग्री हासिल गरे । आफ्नो स्नातक दिनमा, ओमर अब्दुल्ला एनसीपी नेता शरद पवारको घरमा बस्थे । स्नातक पछि, उमरले स्कटल्याण्डको स्ट्राथक्लाइड विश्वविद्यालयबाट व्यवसाय प्रशासनमा स्नातकोत्तर गरेका थिए ।
