वीरगन्ज । बाराको कलैया स्थित बाल एकता बोर्डिङ स्कुलका प्रधानाध्यापक रुपेश स्वर्णकारको हत्या प्रकरणमा थप दुईजना पक्राउ परेका छन् । प्रहरीले रुपेशको हत्यामा संलग्न रहेको आशंकामा दुईजनालाई शनिबार पक्राउ गरेको हो ।
पक्राउ परेका मध्य एकजनाको नाम खुलेको छ । अर्कोको नाम भने प्रहरीले गोप्य नै राखेको छ । पक्राउ परेका एकजना श्याम साह रहेको प्रहरीले जनाएको छ । अर्को एकजनाको भने अनुसन्धानकै क्रममा रहेकोले नाम उल्लेख गर्न नमिल्ने प्रहरीले जनाएको छ ।
रुपेशलाई गोली प्रहार गर्ने सुटर सुजित कुमार सिंहलाई सूचना दिएको अनुसन्धानबाट खुलेपछि प्रहरीले थप अनुसन्धानका लागि दुईजनालाई पक्राउ गरेको बाराका प्रहरी प्रमुख प्रहरी उपरीक्षक सुरेश काफ्लेले जानकारी दिए ।
श्यामले सुजित सिंहलाई सूचना दिएको पुष्टि भएको र अर्को एकजनाको विषयमा भने अनुसन्धान भईरहेको जनाएको छ । सुजितलाई रुपेशको हत्याका लागि सूचना दिएर सुराकी गरेको देखिएकोले उनीहरुलाई पक्राउ गरिएको प्रहरी उपरीक्षक काफ्लेले बताए ।
