वीरगन्ज । आजका विद्यार्थी केवल कक्षाकोठाको पाठ्यपुस्तक र सैद्धान्तिक ज्ञानमा मात्र सीमित छैनन्। विश्व राजनीति, अन्तर्राष्ट्रिय सम्बन्ध र कूटनीतिक जटिलताहरूलाई नजिकबाट बुझ्न उनीहरू आफैं राष्ट्रनायक, कूटनीतिज्ञ र पत्रकारको भूमिकामा उत्रिन थालेका छन्।
यही आधुनिक र व्यावहारिक शिक्षाको उत्कृष्ट उदाहरण प्रस्तुत गर्दै वीरगन्जस्थित गौतम माध्यमिक विद्यालयमा तीन दिने ‘नमूना संयुक्त राष्ट्रसंघ’ GSS-MUN को छैंठौं संस्करण भव्य रूपमा प्रारम्भ गरेको छ।
विद्यालयको सभाहलमा आयोजित एक विशेष समारोहका बिच वीरगन्ज उद्योग वाणिज्य संघका अध्यक्ष हरि गौतमले कार्यक्रमको उद्घाटन गरे। कार्यक्रमको उद्घाटन गर्दै प्रमुख अतिथि गौतमले संयुक्त राष्ट्र संघको स्थापनाको विगत स्मरण गराए ।
उनले विगतमा भएका पहिलो र दोश्रो विश्वयुद्धको चर्चा गर्दै कुनैपनि समस्या र विवाद संवाद, छलफल र कुटनीतिक माध्यमबाट मात्रै समाधान हुने ध्रुवसत्यलाई आत्मसात गरेर नै संयुक्त राष्ट्र संघको स्थापना भएको बताए ।
त्यसैले विद्यार्थीहरुका लागि आयोजना गरिएको नमूना अभ्यासले भोलीका दिनमा विश्व समुदायमा आईपर्ने समस्या समाधानका लागि सफल कुटनीतिज्ञको रुपमा आफूलाई उभ्याउन सक्ने जनशक्ति निर्माणमा सहयोग पुग्ने बताए ।
वीरगन्ज क्षेत्रमा पहिलो पटक गौतम माविले सुरु गरेको यो अभ्यास अहिले स्थानीय शिक्षा क्षेत्रमा एक नयाँ मानक बनेको छ। गौतम माविको यो दूरदर्शी पहललाई पछ्याउँदै अहिले मधेश प्रदेशका अन्य विद्यालयहरूले पनि यस्ता अभ्यास कार्यक्रम आयोजना गर्न थालेका छन्, जसले समग्र क्षेत्रको शैक्षिक वातावरणलाई नै नयाँ दिशा दिएको छ।
तीन दिनसम्म चल्ने यो अभ्यासमा विद्यार्थीहरूले विश्वका विभिन्न सदस्य राष्ट्रहरूको प्रतिनिधित्व गर्दै अन्तर्राष्ट्रिय मुद्दाहरूमा गहन छलफल र संवाद गर्नेछन्। कूटनीतिक मर्यादा, अन्तर्राष्ट्रिय कानुन र विश्वव्यापी चुनौतीहरूबारे बहसमन्दिर खडा गर्दै उनीहरूले आफ्ना तर्कहरू प्रस्तुत गर्नेछन्।
यस अभ्यासको अर्को रोचक पक्ष भनेको अन्तर्राष्ट्रिय सञ्चार माध्यमहरूको भूमिकामा समेत विद्यार्थीहरूलाई नै सहभागी गराउनु हो। यसले उनीहरूलाई कूटनीतिक बहसका साथै विश्व सञ्चार जगत्ले कसरी समाचार सङ्कलन र विश्लेषण गर्छ भन्ने व्यवहारिक अनुभव प्रदान गर्नेछ।
गौतम माध्यामिक विद्यालयका निर्देशक सोनाम लामाका अनुसार विद्यालय तहबाटै यस्ता कार्यक्रम सञ्चालन हुनुले विद्यार्थीहरूको सर्वाङ्गीण विकासमा ठूलो योगदान पुर्याउँछ।
यस्ता मञ्चहरूले बालबालिकालाई जुनसुकै कार्यक्रममा पनि निर्धक रूपमा आफ्ना विचारहरू राख्न, तर्क गर्न र नेतृत्वदायी भूमिका निभाउन सक्ने क्षमताको विकास गराउँछन्।
विश्व समुदायमा भइरहेका राजनीतिक घटनाक्रम, कूटनीतिक सम्बन्ध र बहुपक्षीय संवादको प्रणालीलाई सानै उमेरमा बुझ्न पाउनु वीरगन्जका विद्यार्थीहरूका लागि एक दुर्लभ र फलदायी अवसर बनेको छ।
तीन दिनसम्म चल्ने यो नमूना अभ्यासले भोलिका दिनमा देशभित्र वा अन्तर्राष्ट्रिय मञ्चमा नेतृत्व लिन सक्ने दक्ष, तार्किक र निडर जनशक्ति तयार पार्न महत्त्वपूर्ण इँटा थप्ने विश्वास लिइएको छ।
कार्यक्रमको उद्घाटनसत्रमा विद्यालयकी प्रबन्ध निर्देशक परीक्षा पिया लामा, प्रधानाध्यापक गणेश क्षेत्री, प्रशासन प्रमुख रमेश कुमार शर्मा, नेशनल इन्फोटेक कलेजका निर्देशक मनिष सिंह, मधेस मिडिया काउन्सिलका सदस्य निरज पिठाकोटे लगायत विभिन्न सञ्चार माध्यमसँग आवद्ध सञ्चारकर्मीहरुको उपस्थिति रहेको थियो ।
जीएसएस–एमयुएन छैठौं संस्करणको शुभारम्भमा विद्यालयका इनोभेसन प्रमुख एल्भिन रेञ्जरले स्वागत मन्तव्य व्यक्त गरेको कार्यक्रम तीनदिन सम्म चल्ने जीएसएस–एमयुएन का अध्यक्ष सौराज प्रधानले जानकारी दिए ।
