वीरगन्ज । हिन्दु नेपालीको महान् पर्व बडादशैं आजदेखि औपचारिक रूपमा सुरु भएको छ। आश्विन शुक्ल प्रतिपदाका दिन आज बिहानै घरघरमा वैदिक विधिपूर्वक घटस्थापना गरी जमरा राखिँदै छ।
आज बिहानै नजिकैको नदी वा पवित्र जलशायबाट ल्याइएको जल, गोबर र बालुवा प्रयोग गरी पूजाकोठा वा दशैंघरमा कलश स्थापना गरिन्छ। त्यसै स्थानमा मकै र जौका बीउ छरेर जमरा राख्ने परम्परा छ।
नौ दिनसम्म विधिपूर्वक पूजाआजा गरी उमारिएको पहेँलो जमरालाई विजयादशमीका दिन देवीको प्रसादका रूपमा टीकासँगै लगाउने गरिन्छ। नेपाल पञ्चाङ्ग निर्णायक समितिले आज बिहान ११ बजेर ४७ मिनेटलाई घटस्थापनाको उत्तम साइत तोकेको छ ।
घटस्थापनासँगै शक्तिपीठ, देवीमन्दिर तथा घरघरमा दुर्गा सप्तशती (चण्डी) पाठ र महाकाली, महालक्ष्मी तथा महासरस्वतीको विशेष आराधना सुरु भएको छ।
दशैंको आगमनसँगै उपत्यका छाडेर जन्मथलो फर्किनेहरूको चहलपहल बढेको छ भने बजारहरूमा पनि किनमेल गर्नेहरूको भीड लागेको छ। आजैका दिनदेखि १५ दिनसम्म मनाइने यो पर्वको मुख्य दिन कात्तिक ४ गते विजयादशमी परेको छ।
