वीरगञ्ज । पर्साको विभिन्न नाकाबाट अवैध रूपमा भन्सार छलेर भित्र्याइएका १४ लाख ३६ हजार रुपैयाँभन्दा बढी मूल्यका सामान र दुई वटा ई–लोडर सशस्त्र प्रहरीले बरामद गरी भन्सार बुझाएको छ ।
शुक्रबार वीरगञ्ज महानगरपालिका–१४ स्थित गण्डक चोकबाट सशस्त्र प्रहरी बल नं.१३ गणको टोलीले बिलबिजक बिना ल्याउँदै गरेको दुई वटा ई–लोडरसहित त्यसमा लोड गरिएका कपडा, भाँडाबर्तन, टमाटर तथा किराना सामानहरू नियन्त्रणमा लिएको छ।
उक्त ई–लोडरको मूल्य १० लाख रुपैयाँ र सामानको मूल्य ३ लाख ३४ हजार ९४५ रुपैयाँ गरी जम्मा १३ लाख ३४ हजार ९४५ रुपैयाँ बराबर रहेको छ।
यसै गरी, वीरगञ्ज महानगरपालिका–१६ स्थित इनर्वा सीमा इलाकाबाट सीमा सुरक्षा गुल्म वीरगञ्जको टोलीले भारतबाट अवैध रूपमा भन्सार छली ल्याउँदै गरेको अवस्थामा १ लाख १ हजार ६९० रुपैयाँ बराबरको किराना तथा कस्मेटिक सामान बरामद गरेको छ।
बरामद गरिएका सम्पूर्ण सामान र ई(लोडर आवश्यक कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरी बल पर्साका सूचना अधिकारी तथा सशस्त्र प्रहरी नायब उपरीक्षक सुरज क्षेत्रीले जानकारी दिएका छन्।
