जनकपुरधाम । मधेश प्रदेशको गृह, सञ्चार तथा कानून मन्त्रालयमा सशस्त्र प्रहरी बल, नेपालका प्रहरी महानिरीक्षकको परिचयात्मक तथा समीक्षात्मक भ्रमण सम्पन्न भएको छ।
सो अवसरमा गृह, सञ्चार तथा कानून मन्त्री फकिरा महतो र सशस्त्र प्रहरी बल परिवारबीच प्रदेशको समग्र शान्ति, सुरक्षा, सीमा व्यवस्थापन तथा विपद् प्रतिकार्यमा सहकार्यलाई अझ परिणाममुखी बनाउने विषयमा गहन छलफल भएको छ ।
कार्यक्रममा बोल्दै मन्त्रालयका मन्त्री महतोले खुला सीमा, घना बस्ती र विपद्को जोखिमलाई दृष्टिगत गर्दै प्रदेश र सुरक्षा निकायबीचको निरन्तर समन्वय, विश्वास र सहकार्य अनिवार्य रहेको उल्लेख गरे ।
उनले मन्त्रालयले उपलब्ध स्रोत र साधनको सीमाभित्र रही सुरक्षा व्यवस्थापनलाई चुस्त बनाउन सहयोग जारी राखेको बताए ।
यसै क्रममा गत असोज ८ गते सशस्त्र प्रहरीलाई २० वटा मोटरसाइकल हस्तान्तरण गरिएको र निकट भविष्यमा १ थान चारपाङ्ग्रे गाडी तथा आगामी दिनमा थप चारपाङ्ग्रे र दुईपाङ्ग्रे सवारी साधन उपलब्ध गराइने प्रतिबद्धता समेत जनाएका छन् ।
साथै, सीमा तथा दुर्गम क्षेत्रमा गस्ती र आकस्मिक परिचालन बढाउन सीसीटीभी क्यामेरा जडान, भवन निर्माण र पूर्वाधार विकासमा सहयोग जारी रहने बताए ।
सशस्त्र प्रहरी बलबाट प्राप्त हुने सुझाव र प्राथमिकतालाई गम्भीरतापूर्वक लिँदै जनशक्ति परिचालन, उपकरण हस्तान्तरण, आवास निर्माण र सूचना आदानप्रदानलाई अझ प्रभावकारी बनाउन मन्त्रालय सकारात्मक रहेको स्पष्ट पारेको छ ।
प्रदेश सरकारले सशस्त्र प्रहरीबाट नागरिकमैत्री व्यवहार, उच्च व्यावसायिकता, अनुशासन र मानवअधिकारको सम्मानसहितको जिम्मेवारी सम्पादनको अपेक्षा राखेको छ।
प्रहरी महानिरीक्षकको यस भ्रमणले मन्त्रालय र सशस्त्र प्रहरीबीचको सहकार्यलाई नयाँ उचाइमा पुर्याउने र सुरक्षा प्रणालीलाई थप सुदृढ बनाउने विश्वास व्यक्त गरिएको छ।
