वीरगन्ज। अग्रगामी मोर्चाको मधेश प्रदेशस्तरीय बृहत् कार्यकर्ता भेला तथा अभिमुखीकरण कार्यक्रम भव्यताका साथ सम्पन्न भएको छ।
प्रगतिशील लोकतान्त्रिक पार्टीका मधेश प्रदेश अध्यक्ष अमिताभ बच्चन दासको अध्यक्षतामा सम्पन्न भेला तथा अभिमुखीकरण कार्यक्रममा बोल्ने वक्ताहरुले छठपछि आन्दोलनको तयारीमा रहन आह्वान गरेका छन् ।
विगतका आन्दोलनले संविधानमा केही उपलब्धिहरु प्राप्त भएपनि ती प्राप्त उपलब्धिहरुलाई संस्थागत गर्दै सबै जातजाति, वर्ग, समुदाय, क्षेत्रका जनताको अपनत्व महशुस हुनेगरी संविधान संसोधन गर्नुपर्ने भएकोले त्यसको लागि आन्दोलन आवश्यक रहेको बताएका थिए ।
उनीहरुले नेपालका सबै क्षेत्र, समुदायका नागरिकको समान हक अधिकारका लागि नै नौदलको अग्रगामी मोर्चा बनेको भन्दै यसलाई नागरिक तहसम्म पु-याउन कार्यकर्ताहरुको लागि भेला तथा अभिमुखीकरण कार्यक्रमको आयोजना गरिएको र देशका सातवटै प्रदेशमा भेला तथा अभिमुखीकरण सम्पन्न गरेर आन्दोलन तय गर्ने बताए ।
जनमत पार्टीका नेता गजानन्द यादवले सञ्चालन गरेको कार्यक्रममा मोर्चाका शीर्ष नेतृत्व तथा विभिन्न राजनीतिक दलका प्रमुख एवं संरक्षकहरूले सम्बोधन गरेका थिए।
कार्यक्रममा प्रगतिशील लोकतान्त्रिक पार्टीका संरक्षक जनार्दन शर्मा ‘प्रभाकर’, जनता समाजवादी पार्टी नेपाल (जसपा नेपाल) का अध्यक्ष उपेन्द्र यादव, जनमत पार्टीका अध्यक्ष डा. सीके राउत, आम जनता पार्टी (आजपा) का अध्यक्ष प्रभु साह, नागरिक उन्मुक्ति पार्टीका संरक्षक रेशम लाल चौधरी, नेपाल संघीय समाजवादी पार्टीका अध्यक्ष रिजवान अन्सारी तथा बहुजन एकता पार्टी नेपालका अध्यक्ष हरिनन्दन अम्बेडकरले सम्बोधन गरेका थिए ।
कार्यक्रममा मधेस प्रदेशका पूर्वमुख्यमन्त्रीहरु लालबाबु राउत गद्दी, सरोज यादव, जितेन्द्र सोनल लगायत नेताहरुको पनि उपस्थिति रहेको थियो।
कार्यक्रममा पर्सा, बारा, रौतहटलगायत मधेश प्रदेशका विभिन्न जिल्लाहरूबाट ३ हजार ५ सयभन्दा बढी अग्रगामी मोर्चाका नेता तथा कार्यकर्ताहरूको उत्साहजनक सहभागिता रहेको प्रलोपा मधेस प्रदेश अध्यक्ष अमिताभबच्चन दासले जानकारी दिए ।
समारोहमा बोल्दै शीर्ष नेताहरूले संगठन सुदृढीकरण, राजनीतिक अभिमुखीकरण तथा मोर्चाको आगामी कार्यदिशाका विषयमा आफ्ना धारणा राखेका थिए ।
