वीरगञ्ज । ‘प्याब्सन वाणी प्रतिभा २०८३’ मा गौतम माध्यमिक विद्यालय प्रथम भएको छ ।
संविधान दिवस २०८३ को अवसरमा निजी तथा आवासीय विद्यालय अर्गनाइजेशन नेपाल (प्याब्सन) वीरगञ्ज, पर्साले आयोजना गरेको ‘प्याब्सन वाणी प्रतिभा २०८३’ अन्तरविद्यालय वक्तृत्वकला प्रतियोगितामा गौतम माविकी रीत रौनियार प्रथम भएकी हुन् ।
शनिबार परवानीपुरस्थित डीएभी स्कूलमा आयोजित प्रतियोगितामा १६२ अंक ल्याएर गौतम माध्यमिक विद्यालयकी रीत रौनियार प्रथम भईन् ।
१५८ अंकसहित विद्यासदनकी अफ्रिना खातुन द्वितीय र १५७ अंक प्राप्त गरी द रोयल एकेडेमीकी नलिष्का प्रजापति तृतीय भईन्। यस्तै मुनलाइट माध्यमिक विद्यालयकी मनीषा चौधरी १५६ अंक चौथो र डीएभी आरबी केडिया स्कूलकी सान्वी गुप्ता १५४ अंक ल्याएर पाँचौँ स्थान हासिल गर्न सफल भए।
प्रतियोगितामा प्याब्सन आवद्ध २८ वटा विद्यालयका विद्यार्थीहरूले सहभागिता जनाएका थिए। प्याब्सन पर्साका अध्यक्ष सरोज प्रसाद चौधरीको सभापतित्व तथा पर्साका सहायक प्रमुख जिल्ला अधिकारी कृष्ण प्रसाद चापागाईंको प्रमुख आतिथ्यमा सम्पन्न भएको थियो।
कार्यक्रममा प्याब्सन मधेश प्रदेशका उपाध्यक्षद्वय पुरन प्रधान र इमामुद्दिन अहमद, प्याब्सन पर्साका वरिष्ठ सल्लाहकार प्रकाश उपाध्याय तथा सल्लाहकार हरिश्याम ठाकुर लगायतको उपस्थिति थियो।
उपप्राध्यापक कविराज सुवेदी र शिक्षक हरिप्रसाद प्याकुरेल निर्णायक रहेको प्रतियोगिता कुल २०० पूर्णाङ्कमा मूल्यांकन गरिएको थियो।
