काठमाडौँ। नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले संविधानले परिकल्पना गरेको वास्तविक परिवर्तन पूरा गर्न संविधानका उपलब्धीलाई जनताको दैनिक जीवनसँग जोड्नुपर्नेमा जोड दिएका छन् ।
संविधान दिवस–२०८३ का अवसरमा एक शुभकामना सन्देश जारी गर्दै संयोजक प्रचण्डले सो कुरा बताएका हुन् । ऐतिहासिक दिनका अवसरमा स्वदेश तथा विदेशमा रहेका सम्पूर्ण नेपालीमा सुख, शान्ति र समृद्धिको शुभकामना व्यक्त गर्दै उनले लोकतान्त्रिक गणतन्त्र, सामाजिक न्याय र राष्ट्रिय स्वाधीनताका लागि जीवन उत्सर्ग गर्ने शहीदहरूप्रति श्रद्धाञ्जली अर्पण गरेका छन् ।
प्रचण्डले संविधानलाई केवल कानुनी दस्तावेज नभई दशकौँ लामो जनआन्दोलन, जनयुद्ध र मधेश आन्दोलनको ऐतिहासिक राजनीतिक उपलब्धिको संस्थागत अभिव्यक्ति भएको उल्लेख गरे ।
२०७२ असोज ३ गते संविधानसभाबाट जारी संविधानले नेपाललाई संघीय लोकतान्त्रिक गणतन्त्रका रूपमा संस्थागत गर्दै सार्वभौमसत्ता जनतामा निहित गरेको उनको भनाइ छ।
वर्तमान राजनीतिक परिस्थितिबारे चर्चा गर्दै प्रचण्डले संविधान, संघीयता र जनअधिकारमाथि हुने कुनै पनि किसिमको प्रहार स्वीकार्य नहुने चेतावनी दिएका छन्।
संविधानका मूल्य र जनअधिकारलाई कमजोर पार्ने गतिविधिका विरुद्ध सबै लोकतान्त्रिक शक्तिहरू एकताबद्ध हुनुपर्नेमा उनले जोड दिए ।
साथै, राजनीतिक परिवर्तनलाई आर्थिकसामाजिक रूपान्तरणसँग जोड्दै शिक्षा, स्वास्थ्य, रोजगारी र उत्पादनमा सबै नागरिकको पहुँचना पुर्याउनु पर्ने र संविधानको भावना अनुसार काम गर्नुपर्ने संयोजक प्रचण्डको शुभकामना सन्देशमा उल्लेख छ।
