वीरगन्ज । असोज ११ गते हुने नेपाल कम्युनिष्ट पार्टी (नेकपा) पर्साको एकता भेला, प्रशिक्षण तथा सपथ ग्रहण कार्यक्रमको लागि विभिन्न समितिहरु गठन गरेको छ ।
पार्टीको जिल्ला पदाधिकारीहरुको बैठकले असोज ११ गते वीरगन्जमा हुने जिल्ला एकता भेला, प्रशिक्षण तथा सपथ ग्रहण कार्यक्रमलाई भव्य र सभ्य रुपमा सम्पन्न गर्न मूल व्यावस्थापन समिति र उपसमितिहरु गठन गरेको हो ।
बैठकले जयप्रकाश थारुको संयोजकत्वमा केन्द्रीय सदस्य र प्रदेश सदस्यहरु रहनेगरी २१७ सदस्यीय मूल व्यावस्थापन समिति गठन गरेको छ ।
त्यस्तै थारु कै संयोजकत्वमा फिरोज बादसाह, सब्बा अन्सारी, रुपनारायण सिंह, जयशंकर यादव, अमिरीलाल कलवार, टुनटुन तिवारी, गजाधर पटेल र अनिल पटेल सदस्य रहनेगरी आर्थिक उपसमिति गठन गरेको छ ।
जिल्ला सह–संयोजक गंगा बहादुर खड्काको संयोजकत्वमा प्रतिनिधि व्यावस्थापन उपसमिति, सह–संयोजक फिरोद बादसाहको संयोजक र देवेन्द्र पटेल सह–संयोजक रहनेगरी स्वयंसेवक उपसमिति, विजय प्रसाद महतो संयोजक र हिरा भट्टराई सहसंयोजक रहनेगरी अतिथि सत्कार उपसमिति,
किशोरी प्रसाद कुश्वाहको संयोजकत्वमा प्रेस सेन्टर र समाजवादी प्रेस संगठनका मधेस प्रदेश अध्यक्ष तथा पर्सा अध्यक्षहरु सदस्य रहनेगरी प्रचार प्रसार उपसमिति गठन गरेको पार्टी पर्साका सह–इञ्चार्ज मनोज चौधरीले जानकारी दिए ।
असोज ११ गते वीरगन्जको नगरसभा गृहमा पार्टीका केन्द्रीय संयोजक पुष्पकमल दाहाल ‘प्रचण्ड’ र सह–संयोजक माधव कुमार नेपालको उपस्थितिमा जिल्लाको एकता भेला, प्रशिक्षण तथा सपथ ग्रहण कार्यक्रम तय भएको सह–इन्चार्ज चौधरीले बताए ।
सोमबार नेकपा पर्साका संयोजक जयप्रकाश थारुको अध्यक्षतामा बसेको बैठकमा नेकपाका मधेस प्रदेश सह–संयोजक क्षेत्र बहादुर श्रेष्ठ ‘अनिल’, पर्सा सह–इन्चार्ज मनोज चौधरी, केन्द्रीय सदस्य किशोरी कुश्वाहा, सह–संयोजकहरु गंगा बहादुर खड्का, फिरोज बादसाह लगायतको उपस्थिति रहेको थियो ।
