काठमाडौँ । नेपाली कम्युनिष्ट पार्टी केन्द्रीय कार्य संयोजन समितिको बैठकले रसुवाको भोटेकोशी तथा त्रिशूली नदीमा आएको प्रलयकारी बाढीबाट सिर्जित सङ्कट र यसको दिगो समाधानका लागि २४ बुँदे विशेष प्रस्ताव पारित गरेको छ।
सोमबार पार्टी केन्द्रीय कार्यालयमा संयोजक पुष्पकमल दाहाल ‘प्रचण्ड’को अध्यक्षतामा बसेको उक्त बैठकमा बाढीबाट भएको जनधनको क्षति, प्रभावित क्षेत्रको स्थलगत अनुगमनका क्रममा देखिएका समस्याका साथै उद्धार, राहत, पुनर्स्थापना र पुनर्निर्माणका चुनौतीहरूका सम्बन्धमा गम्भीर छलफल भएको थियो।
बैठकले पारित गरेको २४ बुँदे प्रस्तावमा खोज तथा उद्धार कार्यलाई थप प्रभावकारी बनाउने, राहत सामग्रीको सर्वसुलभ वितरण, अस्थायी आवास निर्माण र दीर्घकालीन पुनर्स्थापनालाई प्राथमिकता दिइएको छ।
त्यसैगरी अत्यावश्यक सेवा र पूर्वाधार पुनःसञ्चालन, जोखिम मूल्याङ्कन, व्यावसायिक राहत, सुरक्षित आवास योजना, पूर्वसूचना प्रणालीको सुदृढीकरण तथा द्रुत प्रतिकार्य टोली परिचालनजस्ता विषय समावेश छन्।
जलवायु परिवर्तनका कारण सिर्जित यस्ता विपद्को सामना गर्न राष्ट्रिय जलवायु तथा विपद् कोषको सुदृढीकरण, अन्तर्राष्ट्रिय स्तरमा जलवायु न्यायका लागि पहल र राष्ट्रिय एकता कायम गर्दै अघि बढ्नुपर्नेमा जोड दिइएको छ।
बाढी प्रभावित नागरिकको जीवन सहज बनाउन र क्षति न्यूनीकरणका लागि सरकार, राजनीतिक दल, स्थानीय तह तथा सबै सम्बद्ध पक्षहरूबीच चुस्त समन्वय हुनुपर्ने निष्कर्ष बैठकले निकालेको छ।
