वीरगन्ज । पर्सा क्षेत्र नम्बर १ का सांसद बुद्धि प्रसाद पन्त (हरि) ले भोटेकोशी र त्रिशूली नदीमा आएको बाढीका कारण बेपत्ता भएका पर्साका नागरिकहरूको शीघ्र उद्धार गर्न सरकारको गम्भीर ध्यानाकर्षण गराएका छन्।
प्रतिनिधि सभाको बैठकमा सांसद पन्तले महाविपत्तिमा परी ज्यान गुमाउनेहरूप्रति श्रद्धाञ्जली अर्पण गर्दै बेपत्ताहरूको खोजतलास र उद्धारका लागि सम्पूर्ण शक्ति लगाउन सरकारसँग माग गरे।
बाढीका कारण समग्र मुलुक शोकमग्न रहेको उल्ले गर्दै सांसद पन्तले पर्सा जिल्लाका धेरै नागरिकहरू हालसम्म बेपत्ता रहेको र उहाँहरूका परिवारजन अझै पनि ‘सास या लास’को आशमा सरकारको बाटो पर्खिरहेको बताए ।
सीमित स्रोत, साधन र दक्ष जनशक्तिको अभावका बीच पनि सरकारले गरेका प्रयासहरूलाई जनताले नियालिरहेको र आशा राखेको उनको भनाइ थियो। उनले मित्र राष्ट्रहरूसँग आवश्यक सहयोग र समन्वय गरेर परिणाममुखी उद्धार कार्य गर्न सरकारलाई आग्रह गरे ।
विशेष गरी त्रिशूली ३ ‘ए’ जलविद्युत् आयोजना क्षेत्रमा बेपत्ता भएका पर्साका इन्जिनियर दिलीप यादव र घट्टेखोला क्षेत्रमा अन्तिम लोकेसन देखिएका सुनिलमान डङ्गोलसहित अचुतम श्रेष्ठ, कमरुल होद्दा अन्सारी, समिम आलम, नवीन कुमार सिंह, नग नारायण पटेल, अजय कुमार यादव, सञ्जय तामाङ, रमन श्रुप, अजिर अन्सारी, सहाबुद्दिन मन्सुरी, सर्फराज मिया, कविता हल्दिया, विकास कुमार वर्णवाल र अरवाज हवाली लगायत सबै बेपत्ता नागरिकहरूको तत्काल उद्धार गर्न उनले सभामुख मार्फत सरकारको ध्यानाकर्षण गराएका छन्।
