पोखरिया । पर्साको पोखरिया नगरपालिका–४, सतवरियास्थित श्री नेपाल राष्ट्रिय कन्या माध्यमिक विद्यालयलाई उपकार सेवा नेपालले ५ थान पंखा सहयोग स्वरूप हस्तान्तरण गरेको छ।
शनिबार विद्यालय प्राङ्गणमा आयोजित एक कार्यक्रमका बिच उपकार सेवा नेपालकी अध्यक्ष विद्या कुमारी सरावगी, संस्थाकी संरक्षक पद्मा देवी सरावगी तथा समाजसेवी सुमन बगाडियाले संयुक्त रूपमा विद्यालयका प्रधानाध्यापक शंकर प्रसाद रौनियारलाई उक्त पंखाहरू हस्तान्तरण गरेका हुन् ।
बढ्दो गर्मीका कारण कक्षाकोठामा अध्ययनरत विद्यार्थीहरूलाई परिरहेको असुविधालाई ध्यानमा राख्दै सहज र अनुकूल शैक्षिक वातावरण निर्माण गर्ने उद्देश्यले पंखा सहयोग गरिएको कार्यक्रमका समन्वयकर्ता नेजामुद्दीन शमानीले जानकारी दिए ।
स्थानीय समाजसेवी, शिक्षाप्रेमी तथा सरोकारवालाहरूको उपस्थिति रहेको सो कार्यक्रममा विद्यालय प्रशासनले उपकार सेवा नेपालप्रति आभार व्यक्त गरेको छ।
यस्ता सामाजिक तथा शैक्षिक सहयोगले सामुदायिक विद्यालयको शिक्षण–सिकाइ वातावरण सुधार गर्न ठुलो योगदान पुग्ने विश्वास विद्यालयले लिएको छ।
