वीरगञ्ज । विभिन्न सीमावर्ती क्षेत्रको नाका हुदै भारतबाट अवैध रूपमा भन्सार छली ल्याउँदै गरिएका औषधी, कपडा, मोटर पार्ट्स, कस्मेटिक तथा किराना सामानसहित सवारी साधन सशस्त्र प्रहरीले नियन्त्रणमा लिएको छ।
सशस्त्र प्रहरी बल नेपाल नं. १३ गण हेड क्वाटर पर्सा मातहतका विभिन्न टोलीले कुल २१ लाख ३९ हजार ६५५ रुपैयाँ बराबरको अवैध सामान र सवारी साधन बरामद गरेको हो।
सशस्त्र प्रहरी बल नेपाल सीमा सुरक्षा गुल्म हेडक्वाटर अलौबाट खटिएको मोबाइल टोलीले वीरगञ्ज महानगरपालिका–१७ अलौ स्थित सीमा क्षेत्रमा भारतबाट अवैध रूपमा ल्याउँदै गरेको प्र. २–०३–००१ स ६०९७ नम्बरको ई–लोडर नियन्त्रणमा लिएको छ।
उक्त ई–लोडरमा ल्याइँदै गरेको १२ लाख ७५ हजार रुपैयाँ बराबरको ८ कार्टुन भिटामिन औषधी र ४ लाख रुपैयाँ मूल्याङ्कन गरिएको ई–लोडर बरामद गरिएको हो।
सोही टोलीले ना २६ प २०१८ नम्बरको २ लाख रुपैयाँ बराबरको मोटरसाइकल र त्यसमा ल्याउँदै गरेको ३१ हजार ९१५ रुपैयाँ बराबरको किराना सामान पनि नियन्त्रणमा लिएको छ।
यसैगरी वीरगञ्ज महानगरपालिका–१६ स्थित भन्सार मेनगेटमा सशस्त्र प्रहरी बल नेपाल सीमा सुरक्षा गुल्म हेडक्वाटर वीरगञ्जको चेकप्वाइन्ट टोलीले चेकजाँचका क्रममा १ लाख ४५ हजार ४०० रुपैयाँ बराबरको बिल विजक नभएको ‘एसडी’ (ESSDEE) ब्राण्डका कपडा, स्टेसनरी र हार्मोनियम सामानहरू बरामद गरेको छ।
उता बिन्दवासिनी गाउँपालिका–३ झौवागुठीमा बिओपी अमरपट्टीबाट खटिएको टोलीले चारवटा साइकलमा भन्सार छली ल्याउँदै गरेको ४७ हजार २०० रुपैयाँ बराबरको मोटर पार्ट्स, कपडा र किराना सामानका साथै आठ हजार रुपैयाँ मूल्य बराबरको साइकल गरी कुल ५५ हजार २०० रुपैयाँको सामान नियन्त्रणमा लिएको सशस्त्र प्रहरी पर्साका प्रवक्ता सशस्त्र प्रहरी नायव उपरीक्षक मोहनराज निरौलाले जानकारी दिए ।
त्यस्तै छिपहरमाई गाउँपालिका–५ भिष्वास्थित बिओपी भिष्वाको टोलीले ३२ हजार १४० रुपैयाँ बराबरको भन्सार छलीका कस्मेटिक तथा किराना सामान बरामद गरेको छ।
बरामद गरिएका सम्पूर्ण सामान, सवारी साधन तथा साइकललाई आवश्यक कानुनी कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरी बल नेपाल नं. १३ गण हेडक्वाटर पर्साका सूचना अधिकारी सशस्त्र प्रहरी नायव उपरीक्षक मोहनराज निरौलाले बताए ।
