काठमाडौं । नेपाल आदिवासी जनजाति पत्रकार महासंघ (फोनिज) ले मधेश र लुम्बिनी प्रदेशका आदिवासी जनजाति पत्रकारहरूका लागि ‘पत्रकार फेलोसिप कार्यक्रम–२०८३’ घोषणा गरेको छ ।
समर्पित अनुदान संयन्त्र (डिजिएम) नेपालको वित्तीय सहयोगमा सञ्चालित यस कार्यक्रमले वन, वातावरण, जलवायु परिवर्तन, दिगो वन व्यवस्थापन र आदिवासी जनजातिको परम्परागत ज्ञानका क्षेत्रमा खोजमूलक पत्रकारितालाई प्रोत्साहन गर्ने उद्देश्य राखेको छ ।
डिजिएम नेपाल आदिवासी तथा स्थानीय समुदायको रेडप्लस लगायतका वन तथा जलवायुसम्बन्धी सहभागिता सुदृढ बनाउन कार्यरत परियोजना हो ।
यस फेलोसिपका लागि डिजिएम नेपाल परियोजना लागू भएका क्षेत्रका आदिवासी जनजाति समुदायका पत्रकारहरूले आवेदन दिन सक्नेछन् ।
आवेदनका लागि इच्छुक पत्रकारले तोकिएका विषयमा न्यूनतम २५० शब्दको मौलिक लेखसहित आवश्यक कागजात पेस गर्नुपर्नेछ । फेलोसिपमा छनोट हुने पत्रकारले अध्ययन, भ्रमण, खोज तथा अनुसन्धानमूलक समाचार, फिचर स्टोरी वा रिपोर्टिङका लागि अधिकतम ४० हजार रुपैयाँसम्म सहयोग प्राप्त गर्ने फोनिजले जनाएको छ ।
सहभागीले तयार गर्ने सामग्री तथ्य र प्रमाणमा आधारित हुनुपर्ने र त्यो कम्तीमा तीन हजार शब्दको भई शब्द र भिडियो दुवै माध्यममा २१ दिनभित्र बुझाउनुपर्ने व्यवस्था गरिएको छ ।
आवेदनका साथमा शैक्षिक प्रमाणपत्र, नागरिकता, स्थायी लेखा नम्बर (प्यान), कार्यरत सञ्चार संस्थाको परिचयपत्र वा सिफारिस र व्यक्तिगत विवरण (सीभी) अनिवार्य गरिएको छ ।
आवेदन दिने म्याद २०८३ साल साउन ३२ गतेसम्म तोकिएको छ र इच्छुक पत्रकारले फोनिजको केन्द्रीय कार्यालयमार्फत आवेदन दिन सक्ने फोनिजका महासचिव समिर बलामीले जानकारी दिएका छन् ।
डिजिएम नेपालकी साधना लिम्बुले आदिवासी र स्थानीय पत्रकारहरूलाई लक्षित गरी सञ्चालित यस कार्यक्रमले स्थानीय समुदायमा सूचना र समाचारको प्रभावकारी पहुँच बढाउने विश्वास व्यक्त गरेकी छन् ।
