वीरगञ्ज। सशस्त्र प्रहरी बल नेपाल नं। १३ गण हेडक्वाटर पर्सा मातहतका विभिन्न टोलीले वीरगञ्जका छुट्टाछुट्टै स्थानबाट भन्सार छली अवैध रूपमा भित्र्याइएका १२ लाख रुपैयाँभन्दा बढी मूल्यका सवारीसाधन तथा विभिन्न मालसामान बरामद गरेको छ ।
विशेष सूचना र नियमित चेकिङका क्रममा बरामद गरिएका ती सामग्रीहरू आवश्यक कारबाहीका लागि वीरगञ्ज भन्सार कार्यालयमा बुझाइएको छ ।
नियमित जाँचका क्रममा सीमा सुरक्षा गुल्म वीरगञ्जको टोलीले वीरगञ्ज महानगरपालिका १६ स्थित भन्सार मेनगेटबाट भारतबाट अवैध रूपमा ल्याइँदै गरेको १ लाख ७० हजार रुपैयाँ बराबरको किराना सामान नियन्त्रणमा लिएको हो ।
यसैगरी वीरगञ्ज महानगरपालिका २ इदगाह चोकबाट भन्सार छली म।प्र। ३–००१ ह ३४५१ नम्बरको अटोमा लोड गरी ल्याउँदै गरेको अटो र कपडासहित कुल ४ लाख ३५ हजार रुपैयाँ बराबरको सम्पत्ति बरामद गरिएको छ ।
प्रहरीका अनुसार वीरगञ्ज महानगरपालिका २४ बहुअरी चोक इलाकामा बीआर ०५ एए २२७३ नम्बरको भारतीय मोटरसाइकलमा लोड गरी ल्याइँदै गरेको १ लाख ९५ हजार रुपैयाँ बराबरको मेडिकल सामान र मोटरसाइकल नियन्त्रणमा लिइएको छ ।
त्यसैगरी भन्सार मेनगेट इलाकाबाटै १ लाख १६ हजार ४०० रुपैयाँ बराबरको कस्मेटिक सामान, रेनकोट र ओसारपसारमा प्रयोग गरिएको घोडासहितको टाँगा बरामद भएको छ ।
त्यस्तै सीमा सुरक्षा गुल्म अलौको टोलीले १ लाख ३९ हजार ६०० रुपैयाँ बराबरको सामान र मोटरसाइकल नियन्त्रणमा लिएको सशस्त्र प्रहरी बल नेपाल नं. १३ गणका सूचना अधिकारी सशस्त्र प्रहरी नायब उपरीक्षक मोहनराज निरौलाले जानकारी दिए ।
यी विभिन्न स्थानका साथै अन्य मातहतका कार्यालयहरूबाट समेत गरी कुल २ लाख ८ हजार ४४० रुपैयाँ बराबरको अवैध सामान बरामद गरिएको छ ।
बरामद गरिएका सम्पूर्ण सवारीसाधन तथा मालसामानहरू आवश्यक कानुनी कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरीले जनाएको छ ।
