वीरगन्ज । आगामी आर्थिक वर्ष २०८३/८४ बजेटमा पर्सा क्षेत्र नम्बर १ का लागि महत्वपूर्ण पूर्वाधार, खेलकुद तथा सहरी विकासका योजनाहरू समेटिएका छन्।
विगतका संसद् र संसदीय विकास कार्यक्रमका प्राथमिकताहरूलाई समेट्दै संघीय सरकारको
रातो किताबमा पर्सा क्षेत्र नम्बर १ मा प्रमुख योजना र बजेट विनियोजनको व्यावस्था गरिएको क्षेत्र नम्बर १ का सांसद हरि पन्तले जानकारी दिए ।
झण्डै दुईतिहाईको रास्वपा सरकारले यसपटकको बजेटमा पनि उपेक्षा ग-यो भन्ने गुनासो सामाजिक सञ्जालमा छरपष्ट भएको थियो । तर, सरकारको रातो किताबमा भने क्रिकेट खेलको विकास र व्यावसायिकतालाई मध्यनजर गर्दै नारायणी रंगशालाको क्रिकेट मैदान थप स्तरोन्नतिका लागि ७ करोड ५० लाख रुपैयाँ छुट्याइएको छ।
यसैगरी नारायणी रंगशालाकै फुटबल मैदानतर्फ फ्लडलाइट जडान तथा मैदान स्तरोन्नतिका लागि ३ करोड रुपैयाँ विनियोजन गरिएको छ। इन्डोर खेलकुदलाई प्रवर्द्धन गर्न नाराराणी बहुउद्देश्य कभर्डहलको थप स्तरोन्नतिका लागि ६ करोड रुपैयाँ विनियोजन भएको छ।
वीरगन्ज महानगरपालिका भित्रका सहरी सडकहरूको स्तरोन्नति, मर्मत सुधार तथा सडक सुरक्षा कार्यक्रमका लागि ९ करोड ५० लाख रुपैयाँ विनियोजन गरिएको छ।
यसैअन्तर्गत वीरगन्ज महानगरका विभिन्न १७ वटा महत्वपूर्ण सडक खण्डहरूको निर्माण तथा स्तरोन्नति गरिनेछ, जसमा आदर्शनगर विद्यालयदेखि प्रतिमा चोक इमर्जसम्मको खण्ड समावेश गरिएको छ।
त्यस्तै जनता सडक आवधिक मर्मत कार्यअन्तर्गत जितपुर–दौडा सडक, प्रसौनी स्कूल–मनियारी, पचनाचौँ–ताजपुर, र पटेलनगर–परवानीपुर क्षेत्रका सडक सञ्जालका लागि १२ करोड रुपैयाँ व्यवस्था गरिएको छ।
औद्योगिक तथा व्यापारिक सहजताका लागि हरपतगञ्जदेखि पूर्व ड्राईपोर्ट ६ लेन जोड्ने सडक निर्माण योजनाका लागि ५ करोड रुपैयाँ विनियोजन गरिएको छ।
वीरगन्ज महानगरपालिका वडा नम्बर ३२ स्थित ज्योति फर्मदेखि चोेरी पुग्ने सडक खण्डमा पर्ने सिसिवा खोलाको पुल निर्माण तथा सडक मर्मत र सुरक्षा कार्यक्रमका लागि कुल २१ करोड ११ लाख ४६ हजार रुपैयाँको ठूलो बजेट व्यवस्था गरिएको छ।
साथै यान्त्रिक व्यवस्थापन डिभिजन पर्साका लागि १ करोड २१ लाख ७५ हजार रुपैयाँ विनियोजन भएको छ। त्यस्तै सुरक्षित नागरिक आवास कार्यक्रमअन्तर्गत आर्थिक वर्ष २०७६ देखिका आवासहरूको भुक्तानी (सबै वडाहरूमा) र सघन सहरी तथा भवन निर्माण योजनाका लागि बजेट सुनिश्चित गरिएको छ।
संघीय कार्यालय भवनहरूको मर्मत सुधारका लागि ३५ लाख ७६ हजार रुपैयाँ छुट्याइएको छ भने कृषि क्षेत्रको आधुनिकीकरण र किसानको सहजताका लागि कृषि ज्ञान केन्द्र पर्सालाई पनि बजेटमा विशेष प्राथमिकता दिइएको छ।
