वीरगन्ज । वीरगञ्जको वडा नम्बर २ छपकैया र वडा नम्बर १६ इनर्वामा राष्ट्रिय स्वतन्त्र पार्टी (रास्वपा) महानगर कमिटीको आयोजनामा अगुवा कार्यकर्ता भेटघाट तथा चिया चर्चा कार्यक्रम सम्पन्न भएको छ।
कार्यक्रमलाई सम्बोधन गर्दै महानगर अध्यक्ष अमन आलमले रास्वपा सरकारमा सहभागी भएदेखि हालसम्म भएका प्रगति र आगामी कार्ययोजनाबारे विस्तृत चर्चा गरेका थिए ।
अध्यक्ष आलमले पार्टीले अहिलेसम्म कसैलाई पनि कुनै पदको उम्मेदवार चयन नगरेको प्रस्ट पार्दै अनावश्यक प्रचारप्रसार गर्नेहरूको भ्रममा नपर्न आग्रह गरे। उनले पार्टीको नीति विपरीत उम्मेदवारीको प्रचार गर्नेहरूलाई कडा कारबाहीका लागि पार्टी मुख्यालयमा जानकारी गराइसकेको समेत बताए।
आम जनताले देशको विकास, सुशासन र समृद्धिका लागि रास्वपालाई मतदान गरेको उल्लेख गर्दै अध्यक्ष आलमले पार्टी सभापतिले कसैलाई पक्षपात नगरी निस्वार्थ रूपमा जनताको सेवामा लाग्न निर्देशन दिएको स्मरण गराए ।
सोही अवसरमा उहाँले केही दिनभित्रै पार्टी कार्यालय तथा जिल्ला अध्यक्ष एवं माननीय हरि पन्तको सचिवालय कार्यालय सञ्चालनमा आउने जानकारी दिए ।
पार्टीका कार्यकर्ताहरूलाई विनम्र र सहयोगी बन्न निर्देशन दिँदै अध्यक्ष आलमले कसैलाई धाकधम्की नदिन र सरकारी कार्यालयहरूमा आफ्नो रवाफ नदेखाउन आग्रह गरे।
उनले सम्पूर्ण नागरिकलाई आफ्नै परिवार सम्झेर सरकारी संयन्त्रलाई थप सशक्त र प्रभावकारी बनाउन सहयोग गर्नुपर्नेमा जोड दिए ।
हाल विकासका साना योजनाहरू स्थानीय र प्रदेश तहबाट कार्यान्वयन हुने भएकाले अबका दिनमा ती तहका आगामी निर्वाचनतर्फ केन्द्रित भएर संगठन विस्तारमा लाग्न उहाँले कार्यकर्ताहरूलाई आह्वान गरे ।
