वीरगन्ज । वीरगन्ज र मधेसका सरोकारवालाहरूले पोखराका पर्यटन व्यवसायीसमक्ष आफ्ना गम्भीर सरोकार र शर्तहरू राखेका छन्। ‘जाऔं है पोखरा’ अभियान लिएर वीरगन्ज आइपुगेको टोलीलाई यहाँका उद्यमी र व्यवसायीले केवल निम्तोले मात्रै पर्यटन नफस्टाउने स्पष्ट पार्दै पूर्वाधार र कनेक्टिभिटीमा देखिएका ठूला खाडलहरू औंल्याएका हुन्।
छलफलका क्रममा वीरगन्ज उद्योग वाणिज्य संघका अध्यक्ष हरि गौतमले पोखराको थकाली संस्कृति र पर्यटनको प्रशंसा गरे पनि त्यसलाई अझै परिस्कृत र आधुनिक बनाउनुपर्ने आवश्यकतामा जोड दिए। उनले भारतीय पर्यटकलाई आकर्षित गर्न सीमा नाकामै एकीकृत जाँच प्रणालीमार्फत सहज वातावरण बनाउनुपर्ने र कछुवा गतिको सडक पूर्वाधार निर्माणले पर्यटकहरू अन्यत्रै मोडिने खतरा रहेको भन्दै पोखरेली टोलीलाई सचेत गराए।
कनेक्टिभिटीको मुद्दालाई जोडदार रूपमा उठाउँदै संघका निवर्तमान अध्यक्ष अनिल अग्रवालले सिमरा–पोखरा हवाई उडान बन्द हुनुले पर्यटन क्षेत्रमा ठूलो धक्का लागेको बताए। उनले ‘वेडिङ डेस्टिनेसन’ का रूपमा नेपाललाई विकास गर्न अझै उच्चस्तरको पूर्वाधार आवश्यक रहेको भन्दै बन्द हवाई सेवा तत्काल सुचारु गर्न जोड दिए।
त्यस्तै, वरिष्ठ उपाध्यक्ष माधव राजपालले भारतीय पर्यटकको आवागमनलाई झन्झटमुक्त नबनाएसम्म पर्यटन विकासको कुरा गर्नु व्यर्थ हुने टिप्पणी गरे। सञ्चारकर्मीका तर्फबाट श्याम बञ्जराले राज्यको नीतिगत कमजोरी र व्यवसायीले सञ्चार क्षेत्रलाई दिने सहुलियतमा देखाएको उदासीनताप्रति गुनासो पोखे।
कार्यक्रममा संविधानसभा सदस्य ओमप्रकाश शर्मा, पर्यटन बोर्ड पोखराका निर्देशक लक्ष्मण सुवेदी, नेपाल भारत सहयोग मञ्चका अध्यक्ष अशोक वैद, नेपाल पत्रकार महासंघका केन्द्रीय सचिव अशोक तिवारी लगायतले सम्बोधन गरेका थिए । उपस्थित पर्यटन व्यवासायी र सञ्चारकर्मीहरुले पोखरामा पाहुनालाई हुने समस्याहरुको बारेमा जिज्ञाशा राखेका थिए ।
आफ्नो बचाउ गर्दै होटल संघ पोखराका अध्यक्ष मणि लामिछानेले सेवामा रहेका कमजोरी सुधार्ने प्रतिबद्धता जनाउँदै वीरगन्जको सहयोग मागेका छन्। वीरगन्जमा आफ्ना माग र सरोकारहरू राखेपछि पोखराको टोली बिराटनगरतर्फ लागेको छ ।
