वीरगन्ज । पर्सा निर्वाचन क्षेत्र नम्बर १ का प्रतिनिधि सभा सदस्य पदका उम्मेदवार बुद्धि प्रसाद पन्त (हरि) ले चुनावी खर्च सार्वजनिक गरेका छन्।
उम्मेदवार बुद्धि प्रसाद पन्त (हरि)को तर्फबाट निर्वाचन प्रतिनिधि महमद मसुदिन आलमले जिल्ला निर्वाचन कार्यालय पर्सामा १० लाख २२ हजार ७ सय रुपैयाँ बराबरको खर्च विवरण पेस गरेका हुन्।
२०८२ चैत ८ गते दर्ता गरिएको उक्त विवरण अनुसार निर्वाचनका विभिन्न शीर्षकमा खर्च भएको रकमकाे विवरण निर्वाचन कार्यालयमा बुझाएकाे हाे।
खर्चको ठूलो हिस्सा सवारी साधन भाडा र प्रचार सामग्रीमा खर्च भएको छ। विवरण अनुसार दुई थान सवारी साधनको भाडा बापत २ लाख ६० हजार रुपैयाँ भुक्तानी गरिएको छ भने फ्लेक्स प्रिन्टिङमा १ लाख ३५ हजार र अन्य प्रचार सामग्री छपाइमा १ लाख ६५ हजार ५ सय ५० रुपैयाँ खर्च भएको छ।
यसैगरी उम्मेदवारी दर्ताका लागि १० हजार, मतदाता नामावली प्रिन्टमा २२ हजार र कार्यकर्ता तथा स्वयंसेवकका लागि खाजा, गोष्ठी एवं सम्मेलनमा १ लाख ४० हजार १ सय ५० रुपैयाँ खर्च भएको उल्लेख छ।
प्रतिनिधि सभा सदस्य निर्वाचन ऐन २०७४ को दफा ७२ र निर्वाचन आचारसंहिता बमोजिम उम्मेदवारले चुनाव सकिएपछि अनिवार्य रूपमा खर्च विवरण बुझाउनुपर्ने व्यवस्था छ।
पन्तको चुनावी अभियानमा झण्डा बनाउनका लागि मात्रै १ लाख २३ हजार रुपैयाँ खर्च भएको विवरणमा उल्लेख छ। जिल्ला निर्वाचन कार्यालय पर्सामा दर्ता नम्बर २१६ मा अभिलेखिकरण गरिएको यो विवरणले चुनावी प्रतिस्पर्धामा हुने आर्थिक गतिविधिलाई पारदर्शी बनाउने प्रयास गरेको देखिन्छ।
