वीरगन्ज । वीरगन्जका कानुनका विद्यार्थीहरूले जेन्जी आन्दोलनको सत्यतथ्य छानबिन गर्न गठित ‘कार्की आयोग’ को प्रतिवेदन तत्काल सार्वजनिक गर्न माग गर्दै विरोध प्रदर्शन गरेका छन्।
वीरगन्जको घण्टाघरमा भेला भएका विद्यार्थीहरूले प्लेकार्डसहित प्रदर्शन गर्दै सुशीला कार्की नेतृत्वको अन्तरिम सरकारले प्रतिवेदन लुकाउन खोजेको आरोप लगाएका हुन्।
गत भदौ २३ र २४ गते भएको जेन्जी आन्दोलनका क्रममा भएका घटनाको छानबिन गर्न पूर्व न्यायाधीश गौरीबहादुर कार्कीको अध्यक्षतामा उच्चस्तरीय जाँचबुझ आयोग गठन गरिएको थियो।
आयोगले आफ्नो कार्य सम्पन्न गरी सरकारलाई प्रतिवेदन बुझाइसकेको भए पनि निर्वाचन सम्पन्न भई नयाँ सरकार गठनको प्रक्रिया सुरु हुँदासम्म प्रतिवेदन सार्वजनिक नगरिएकोमा विद्यार्थीहरूले आक्रोश व्यक्त गरेका छन्।
प्रदर्शनकारीहरूले ‘कार्की आयोगको प्रतिवेदन खोई?’, ‘सत्यतथ्य सार्वजनिक गर’ जस्ता नारा लगाउँदै नयाँ सरकार गठन हुनुअघि नै दोषी र घटनाका मुख्य योजनाकारहरूको पहिचान बाहिर ल्याउनुपर्ने माग राखेका छन्।
आन्दोलनमा ज्यान जोखिममा पार्नेहरू र भौतिक संरचना जलाउन उक्साउने तत्वहरू चिन्नका लागि प्रतिवेदन सार्वजनिक हुनु अनिवार्य रहेको उनीहरूको तर्क छ। माग सम्बोधन नगरिए हिजोको जेन्जी आन्दोलनभन्दा पनि सशक्त र कडा आन्दोलन छेड्ने चेतावनी विद्यार्थीहरूले दिएका छन्।
