वीरगञ्ज । आगामी फागुन २१ गते हुने प्रतिनिधिसभा सदस्य निर्वाचनको तयारीका लागि पर्सा जिल्लाभर मतदाता शिक्षा कार्यक्रमलाई तीव्र पारिएको छ। वीरगञ्ज महानगरपालिकासहित जिल्लाका १४ वटै पालिकाका १ सय २० वटा वडाहरूमा अहिले मतदाता सचेतना अभियान चलिरहेको छ।
जिल्ला निर्वाचन कार्यालय पर्साले बदर मतको सङ्ख्या न्यूनीकरण गर्न र मतदान प्रक्रियाबारे स्पष्ट पार्न १ सय २० जना अनुभवी स्वयंसेवक तथा सहजकर्ताहरू परिचालन गरेको छ। गत फागुन ३ गतेदेखि सुरु भएको यो अभियान फागुन १७ गतेसम्म जारी रहने कार्यालयकी प्रमुख अनामीका रौनियारले जानकारी दिनुभयो।
स्वयंसेवकहरूले मतदाताको घरदैलोमै पुगेर नमुना मतपत्रमार्फत सही तरिकाले स्वस्तिक छाप लगाउने र मतपत्र पट्याउने विधि सिकाइरहेका छन्। ३ लाख ५२ हजार ४ सय ८४ मतदाता रहेको पर्सामा यस अभियानले निर्वाचनमा मतदाताको सक्रिय सहभागिता बढाउने र प्राविधिक त्रुटिका कारण मत बदर हुने समस्यालाई कम गर्ने विश्वास लिइएको छ।
