हेटौँडा । मकवानपुरको हेटौँडा उपमहानगरपालिका वडा नम्बर १६ स्थित चिसापानी चोकमा आज बिहानै बम जस्तो देखिने शंकास्पद वस्तु फेला परेपछि स्थानीय बासिन्दा त्रसित बनेका छन्।
बिहान सबेरै बजार निस्किएका स्थानीयले सडक छेउमा शंकास्पद वस्तु देखेपछि तत्काल सुरक्षा निकायलाई जानकारी गराएका थिए। स्थानीय राजेश वाग्लेका अनुसार, अपरिचित वस्तु देखिएपछि चिसापानी बजार क्षेत्रमा त्रास फैलिएको छ।
घटनाको जानकारी पाएलगत्तै नेपाल प्रहरी र नेपाली सेनाको टोली घटनास्थल पुगिसकेको छ। सुरक्षाकर्मीले उक्त क्षेत्रलाई आफ्नो नियन्त्रणमा लिएर सर्वसाधारणको आवतजावतमा रोक लगाएका छन्। नेपाली सेनाको बम डिस्पोजल टोली शंकास्पद वस्तुको परीक्षण र त्यसलाई सुरक्षित रूपमा निष्क्रिय (डिस्पोज) गर्ने तयारीमा जुटेको छ।
उक्त वस्तु बम नै हो या त्रास फैलाउन राखिएको नक्कली वस्तु (होक्स) हो भन्नेबारे डिस्पोजलपश्चात् मात्रै आधिकारिक पुष्टि हुने प्रहरीले जनाएको छ। थप विवरण आउन बाँकी छ।
