विराटनगर । नेपाल–भारत सीमा सुरक्षा समन्वय बैठकमा सहभागी सशस्त्र प्रहरी बल नेपालका उपरीक्षक (एसपी) राजेश घिमिरेको उपचारका क्रममा शुक्रबार राति निधन भएको छ।
मोरङको विराटचोकमा शुक्रबार दिउँसो आयोजित नेपाल सशस्त्र प्रहरी बल र भारतको सीमा सुरक्षा बल (एसएसबी) बीचको डीआईजी तहको समकक्ष समन्वय बैठक चलिरहेका बेला एसपी घिमिरे अचानक बेहोस भएर ढलेका थिए।
सशस्त्र प्रहरी बल नम्बर १ बराह बाहिनी, सुनसरी पकलीका डीआईजी कुमार न्यौपानेका अनुसार बैठकस्थलमै ढलेपछि घिमिरेलाई तत्काल उपचारका लागि मोरङको बुढीगंगास्थित विराट शिक्षण अस्पताल लगिएको थियो। चिकित्सकहरूले हरसम्भव प्रयास गरे पनि उनलाई बचाउन नसकिएको अस्पताल स्रोतले जनाएको छ।
अस्पतालका अनुसार एसपी घिमिरेको शुक्रबार राति ८ बजेर ५२ मिनेटमा उपचारकै क्रममा निधन भएको हो। प्रारम्भिक चिकित्सकीय विवरणअनुसार उनलाई हृदयघात (हार्ट अट्याक) भएको डीआईजी न्यौपानेले जानकारी दिनुभयो।
निधन भएका एसपी घिमिरे हालै मात्र नम्बर ३ बाहिनी गाढीमाई मुख्यालय, मकवानपुरमा सरुवा भएका थिए। उनी शनिबार नै नयाँ कार्यक्षेत्रतर्फ जाने तयारीमा थिए। तर, वर्तमान जिम्मेवारीबाट बिदा हुनुअघि नै यो दुःखद घटना भएको हो।
हाल उनको शव पोस्टमार्टमका लागि विराट मेडिकल कलेज (शिक्षण अस्पताल) को शवगृहमा राखिएको छ।
कर्तव्यनिष्ठ, अनुशासित र अनुभवी अधिकृतका रूपमा परिचित एसपी घिमिरेको असामयिक निधनले सशस्त्र प्रहरी बल संगठनभित्र तथा उनका परिवारजनमा गहिरो शोक छाएको छ।
