वीरगन्ज । मधेस प्रदेशका उर्जा, सिँचाई तथा खानेपानी मन्त्री जवाहरलाल कुश्वाहा र वीरगन्ज महानगरपालिकाका नगर प्रमुख राजेशमान सिंहबीच भेटवार्ता भएको छ ।
वीरगन्ज महानगरपालिकाका नगर प्रमुखको कार्यकक्षमा भएको भेटमा वीरगन्ज महानगरपालिकामा देखिएको खानेपानीको दीर्घकालिन समस्या समाधानका प्रदेश सरकार र महानगरपालिकाबीच समन्वय र सहकार्य गर्ने बारेमा छलफल भएको थियो ।
महानगरपालिकामा खानेपानीका अधुरा योजनाहरु भए त्यसलाई पूरा गर्ने र थप खानेपानीको दीर्घकालिन समाधानको लागि आवश्यक योजना र बजेटका लागि प्रदेश सरकारमा विस्तृत विवरण सहित कागजात पेश गर्न आग्रह गरे ।
महानगर प्रमुख राजेशमान सिंहले अहिले तत्काल वीरगन्ज महानगरपालिकाको वडा नम्बर ३० र ३१ मा रहेको ओभरहेड टंकीबाट पानी आपूर्तिका लागि आवश्यक पाईपहरु उपलब्ध गराउन माग गरे ।
त्यस्तै वीरगन्ज महानगरपालिकाको सबैभन्दा चुनौतीको रुपमा रहेको सिर्सिया नदि प्रदूषण नियन्त्रणका लागि प्रदेश सरकारबाट आवश्यक नीति र व्यावस्थापनका लागि आवश्यक बजेट पनि उपलब्ध गराउन माग गरे ।
उनले नगरवासीहरुलाई आगामी दिनमा खानेपानीको समस्या हुन नदिनका लागि आवश्यक तयारी र वाटर रिचार्ज लगायतका वैकल्पिक योजनाहरुमा विशेष ध्यान दिन आग्रह गरे ।
उनले बाराको अमलेखगंजमा बनाईएको जलपुर्नभरण योजना जस्तै वीरगन्ज महानगरपालिकामा पनि आवश्यक रहेको औंल्याउदै त्यसको प्राविधिक तथा आर्थिक सहयोगका लागि आग्रह गरे ।
महानगरपालिकामा आएका मन्त्री कुश्वाहलाई महानगर प्रमुख सिंहले खादा लगाएर स्वागत पनि गरेका थिए । छलपलमा वीरगन्ज महानगरपालिकाका प्रमुख प्रशासकीय अधिकृत अरविन्दलाल कर्ण, वातावरण महाशाखाका प्रमुख इञ्जिनियर राकेश साह, नगरका प्रमुख स्वकीय सचिव सत्यराज घिमिरे लगायतको उपस्थिति रहेको थियो ।
