वीरगन्ज । पर्सा प्रहरीले झुठा विवरण पेश गरी सरकारी कागजात बनाएको आरोपमा बीरगंजबाट तीन जना भारतीय नागरिकलाई पक्राउ गरेको छ।
जिल्ला प्रहरी कार्यालय पर्साका सूचना अधिकारी प्रहरी नायव उपरीक्षक राजु कार्कीका अनुसार, योजनाबद्ध रूपमा जन्मदर्ता, विवाहदर्ता र नागरिकता लगायतका कागजातहरू कीर्ते गरेको सूचनाको आधारमा उनीहरूलाई नियन्त्रणमा लिइएको हो।
पक्राउ पर्नेमा दुई जना भारतीय पुरुष र एक जना महिला रहेका छन्। उनीहरूलाई मिति २०८२ पुस २ गते बीरगंज महानगरपालिका वडा नं. १६, नगवास्थित एक स्थानबाट आवश्यक कागजातसहित प्रहरी टोलीले फेला पारेको थियो।
पक्राउ परेका व्यक्तिहरूमाथि ‘नागरिकता–राष्ट्रिय परिचयपत्र तथा पञ्जीकरण ऐन २०७६’ अन्तर्गतको कसूरमा थप अनुसन्धान भइरहेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक राजु कार्कीले जानकारी दिए ।
प्रहरीले उनीहरूले कसरी र कसको सहयोगमा यी कागजातहरू तयार पारे भन्ने विषयमा पनि सुक्ष्म अध्ययन गरिरहेको जनाएको छ।
वीरगन्ज र आसपासका सीमावर्ती क्षेत्रमा विदेशी नागरिकले झुठा विवरणका आधारमा नेपाली सरकारी कागजात बनाउने प्रयास गरिरहेको गोप्य सूचना प्राप्त भएपछि प्रहरीले निगरानी बढाएको थियो।
