वीरगञ्ज । स्रोत नखुलेको ठुलो परिमाणको नगद (हुण्डीको रकम) सहित प्रहरीले वीरगञ्जबाट तीन जना भारतीय नागरिकलाई पक्राउ गरेको छ। जिल्ला प्रहरी कार्यालय पर्साबाट खटिएको विशेष टोलीले ६ लाख ७१ हजार ९ सय ५० रुपैयाँसहित उनीहरूलाई नियन्त्रणमा लिएको हो।
कसरी भयो गिरफ्तारी? विशेष सूचनाको आधारमा मिति २०८२ पुस १४ गते खटिएको प्रहरी टोलीले वीरगञ्ज महानगरपालिका वडा नं. १० स्थित मकालु चोकमा शंकास्पद रूपमा रहेका व्यक्ति र सवारी साधनमाथि निगरानी बढाएको थियो। चेकजाँचका क्रममा दुईवटा मोटरसाइकलमा सवार तीनै जनाको साथबाट स्रोत नखुलेको रकम बरामद भएको हो।
पक्राउ परेका व्यक्ति र बरामद रकमको विवरण: १. अनवर मिया र महमद कैफ अहमद: भारत बिहार, बेतिया घर भई हाल वीरगञ्ज-२ छप्कैया बस्ने ५० वर्षीय अनवर मिया र उनका २२ वर्षीय छोरा महमद कैफ अहमद BR 22 H 6338 नम्बरको भारतीय मोटरसाइकलमा सवार थिए। अनवरको गोजीबाट १,३०,९५० रुपैयाँ र छोरा महमदको गोजीबाट ३ लाख रुपैयाँ गरी कुल ४,३०,९५० रुपैयाँ बरामद भएको छ।
२. फूल महमद: भारत बिहार, मोतिहारी घर भएका ४८ वर्षीय फूल महमद लु ४१ प ६८९७ नम्बरको मोटरसाइकलमा सवार थिए। उनको ज्याकेटको खल्तीबाट २,४१,००० रुपैयाँ बरामद गरिएको प्रहरीले जनाएको छ।
कानुनी प्रक्रिया: पक्राउ परेका तीनै जना विरुद्ध मुलुकी अपराध संहिता, २०७४ को दफा १२५ को (क) (हुण्डी सम्बन्धी कारोबार गर्न नहुने कसूर) अन्तर्गत मुद्दा चलाइएको छ। सम्मानित पर्सा जिल्ला अदालतबाट ३ दिनको म्याद थप अनुमति लिई उनीहरूमाथि थप अनुसन्धान भइरहेको जानकारी प्रहरीले दिएको छ।
