काठमाडौँ — जेनजीआन्दोलनका क्रममा भएको आगजनीमा परी गम्भीर घाइते भएकी पूर्वप्रधानमन्त्री एवं नेकपा कम्युनिष्ट पार्टीका सम्मानित नेता झलनाथ खनालकी धर्मपत्नी प्राध्यापक रविलक्ष्मी चित्रकारको स्वास्थ्य अवस्था बुझ्न शीर्ष नेताहरू डल्लु पुगेका छन् ।
नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालले बुधबार डल्लुस्थित खनालको अस्थायी निवासमा पुगेर चित्रकारको स्वास्थ्य अवस्थाबारे जानकारी लिनुका साथै शीघ्र स्वास्थ्यलाभको कामना गरेका छन् ।
गत साता मात्रै भारतको दिल्लीस्थित एपोलो अस्पतालमा तीन महिना लामो उपचार प्रक्रिया पूरा गरी स्वदेश फर्किनुभएकी चित्रकारलाई भेट्न दुवै नेताहरू सँगै पुगेका थिए । भेटका क्रममा नेता झलनाथ खनालले पत्नीको पछिल्लो स्वास्थ्य अवस्थाबारे जानकारी गराएका थिए ।
उनले रविलक्ष्मीको अवस्था अहिले खतरामुक्त रहेको तर जलनका कारण भएको गहिरो चोट र संक्रमणका कारण अझै केही समय चिकित्सकीय निगरानी र नियमित उपचारमै रहनुपर्ने बताए ।
आगजनीका क्रममा फोक्सोमा विषाक्त ग्यास पसेको र देब्रे हातमा गम्भीर चोट लागेका कारण उहाँको अवस्था निकै जटिल बनेको थियो।
भदौ २४ गते डल्लुस्थित निवासमा प्रदर्शनकारीले आगजनी गर्दा चित्रकार घरभित्रै फसेर गम्भीर घाइते हुनुभएको थियो। सुरुमा कीर्तिपुर बर्न अस्पतालमा उपचार गराइए पनि स्वास्थ्यमा थप जटिलता देखिएपछि उहाँलाई एयर एम्बुलेन्समार्फत दिल्ली लगिएको थियो।
उपचारकै क्रममा संक्रमण फैलिन नदिन चिकित्सकहरूले उहाँको देब्रे हात काट्नुपरेको थियो। अहिले उहाँको स्वास्थ्यमा क्रमिक सुधार आएपछि चिकित्सकको सल्लाहमा नेपाल फर्काइएको हो।
भेटका क्रममा प्रचण्ड र माधव नेपालले यस्तो अमानवीय घटनाप्रति दुःख व्यक्त गर्दै दोषीमाथि कडा कारबाही र घाइतेको पूर्ण उपचारमा राज्यको ध्यानाकर्षण गराउने प्रतिबद्धता समेत व्यक्त गरेका छन् । एको छ।
