वीरगन्ज । पर्साको पर्सागढी नगरपालिकामा २११ औं पर्सागढी विजय उत्सवलाई ऐतिहासिक र भव्य रूपमा मनाउन व्यापक तयारी सुरु गरिएको छ। मंगलबार नगरप्रमुख गोकर्ण पाठकको अध्यक्षतामा सम्पन्न विशेष अन्तरक्रिया तथा छलफल कार्यक्रमले उत्सव व्यवस्थापनका लागि महत्वपूर्ण निर्णयहरू गरेको पर्सागढी नगरपालिकाका प्रमुख प्रशासकीय अधिकृत राजु प्रसाद साहले जानकारी दिए ।
बैठकले आगामी २०८२ पुस १९ गते बिहान १०स्०० बजेदेखि नगरभित्रका विद्यार्थी, कर्मचारी, शिक्षक, सामाजिक अगुवा र आम सर्वसाधारणको उपस्थितिमा सांस्कृतिक झाँकीसहितको भव्य विजय उत्सव मनाउने निर्णय गरेको छ।
ऐतिहासिक वीरताको प्रतीकका रूपमा रहेको यस दिवसलाई उत्सवमय बनाउन नगरपालिकाले सबै क्षेत्रका नागरिकहरूलाई गरिमामय उपस्थितिका लागि हार्दिक निमन्त्रणा समेत गरेको छ। यो उत्सवले पर्सागढीको ऐतिहासिक पहिचानलाई उजागर गर्दै स्थानीय एकता र गौरवलाई थप मजबुत बनाउने विश्वास लिइएको नगर प्रमुख गोकर्ण पाठकले जानकारी दिए ।
पर्सागढी तत्कालिन इष्ट इण्डिया कम्पनीलाई गोर्खाली सेनाले हराएको विजयगढी हो । नेपालका गढीहरु मध्य गोर्खाली सेनाले विजय प्राप्त गरेको गढी पर्सागढीमा राज्यको ध्यान नजसक्दा बर्षौदेखि जीर्ण अवस्थामा थियो । स्थानीय सरकारको गठनपछि यसको महत्व बढाउनका लागि र संरक्षण तथा विकासका लागि प्रचार प्रसार, नेपाली सेनाले पनि चासो बढाएको थियो । त्यस यता बर्षेनि पर्सागढीमा विजयवोत्सव मनाउदै आएको छ ।
मंगलबार भएको छलफल तथा बैठकमा नेपाली सेनाको श्रीपूरस्थित श्री जंग गणका गणपति लोकेन्द्र कार्की, पर्सागढी नगरपालिकाकी उपप्रमुख पूजा चौधरी, प्रमुख प्रशासकीय अधिकृत राजु प्रसाद साह सहित कर्मचारीहरू, विभिन्न राजनीतिक दलका प्रतिनिधि, मन्दिर व्यवस्थापन समितिका अध्यक्ष वृजमोहन चौधरी, विद्यालयका शिक्षक तथा समाजसेवी र बौद्धिक व्यक्तित्वहरूको सक्रिय सहभागिता रहेको थियो।
