वीरगन्ज। प्रेस सेन्टर नेपाल, बाराका साधारण सदस्य एवं अग्रज फोटो पत्रकार फैजुल्लाह आलमको निधनप्रति प्रेस सेन्टर नेपालले गहिरो दुःख व्यक्त गरेको छ ।
संगठनका महासचिव मनोज घर्तीमगरले शनिबार एक वक्तव्य जारी गर्दै आलमको निधनले नेपाली पत्रकारिता क्षेत्र र प्रेस सेन्टर नेपाललाई अपूरणीय क्षति पुगेको उल्लेख गरेका छन् ।
‘उहाँको निधनले नेपाली पत्रकारिता क्षेत्रले एक कुशल र मेहनती फोटो पत्रकार गुमाएको छ भने प्रेस सेन्टर नेपालले एक परिपक्व सदस्य गुमाएको छ ।’ वक्तव्यमा भनिएको छ, ‘फोटो पत्रकारितामार्फत उहाँले पुर्याउनुभएको योगदानको संगठन उच्च सम्मान गर्दछ ।’
संगठनले दिवंगत आलमप्रति भावपूर्ण श्रद्धाञ्जली अर्पण गर्दै उहाँले देख्नुभएका सपना पूरा गर्न सदैव लागिरहने प्रण समेत गरेको छ । दुःखको यस घडीमा प्रेस सेन्टरले शोकसन्तप्त परिवारजनप्रति गहिरो समवेदना प्रकट गरेको छ ।
आलमको ५३ वर्षको उमेरमा निधन भएको छ । मस्तिष्क रक्तश्रावका कारण उपचाररत आलमको शुक्रबार बाराको परवानीपुर गाउँपालिका वडा नं। ३ स्थित आफ्नै निवासमा निधन भएको हो ।
एक साताअघि मस्तिष्क रक्तश्राव भएपछि उनलाई उपचारका लागि वीरगञ्ज र चितवनका विभिन्न अस्पताल पुर्याइएको थियो ।
अस्पतालमा गरिएको उपचार प्रयास सफल हुन नसकेपछि उनलाई घर ल्याइएको थियो । लामो समयदेखि फोटो पत्रकारितामा सक्रिय आलम बाराका एक कुशल र मेहनती पत्रकारका रूपमा परिचित थिए। मृतक आलमका श्रीमती र तीन छोरी छन् ।
