जनकपुरधाम । मधेश प्रदेशका प्रदेश प्रमुख माननीय सुरेन्द्र लाभ कर्णले दशकौंको संघर्षपछि प्राप्त संघीय लोकतान्त्रिक गणतन्त्रलाई सबल बनाउँदै सामाजिक, राजनीतिक र आर्थिक समृद्धिको मार्गमा गतिशील रहन सम्पूर्ण प्रदेशवासीलाई आह्वान गरेका छन्।
हालै केही दिनदेखि मधेश प्रदेशमा उत्पन्न राजनीतिक अस्थिरताले अनिश्चितता, आशंका र अविश्वासको वातावरण सिर्जना भएको जसले गर्दा समग्र सामाजिक, राजनीतिक, आर्थिक, प्रशासनिक र विकासात्मक गतिविधिहरू नराम्रोसँग प्रभावित भएको भन्दै प्रदेश प्रमुख कर्णले चिन्ता व्यक्त गरेका छन्।
संविधान २०७२ को मूल मन्त्र सहअस्तित्व, समन्वय र सहकार्यु लाई हृदयंगम गर्दै देश र प्रदेशमा एकअर्काको अस्तित्व र मर्यादालाई सम्मान गरेर समुन्नत भविष्यको लागि हातेमालो गर्दै अघि बढ्नु अपरिहार्य रहेको उनको भनाइ छ।
संघीय व्यवस्था कार्यान्वयनका लागि स्वर मुखरित गर्ने भूखण्ड मधेश प्रदेशका आम नागरिक र प्रदेश सरकारबाट संघीयताको संवर्द्धन र प्रवर्द्धनमा विशेष सतर्कताका साथ योगदान अपेक्षित रहेको उनले बताए।
अन्त्यमा, प्रदेश प्रमुख कर्णले हाल उत्पन्न राजनीतिक अनिश्चितताको वातावरणलाई विधिसम्मत निकास दिन र सुशासनयुक्त, सुशिक्षित, सुस्वास्थ्य एवं समुन्नत मधेश प्रदेश निर्माणको महायज्ञमा एकताबद्ध भई सहकार्यको संस्कृति विकास गर्दै सकारात्मक अग्रसरताका लागि सम्पूर्ण राजनीतिक दल, राजनीतिक व्यक्तित्व, सञ्चार जगत, बौद्धिक वर्ग, व्यवसायी वर्ग, नागरिक समाज, राष्ट्र सेवक कर्मचारी तथा सम्पूर्ण मधेश प्रदेशवासीलाई हार्दिक आह्वान गरेका छन्।
