कलैया । बाराको सदरमुकाम कलैयामा आतंक मच्चाइरहेको बहुला कुकुरलाई जिल्ला प्रहरी कार्यालय बाराले नियन्त्रणमा लिएको छ। शनिबार कलैया उपमहानगरपालिकाको बरेवा क्षेत्रमा प्रहरीले उक्त कुकुरलाई नियन्त्रणमा लिएरसमस्या समाधान गरेको जिल्ला प्रहरी कार्यालय बाराले जनाएको छ।
प्रहरीको यो कदमले स्थानीयवासीलाई ठूलो राहत पाएको छ। जिल्ला प्रहरी कार्यालय बाराका अनुसार, गत कार्तिक ४ गते उक्त बहुला कुकुरको टोकाइबाट नेपाल पत्रकार महासंघका पूर्व उपाध्यक्ष राकेश पाण्डेयसहित उदजनौ जना स्थानीयवासी घाइते भएका थिए।
कुकुरले बसतपुर, घोगलरिया, कलैया, बरेवा टोल, सिसहनिया लगायतका क्षेत्रमा आतंक मच्चाएको थियो। स्थानीयवासीमा त्रास फैलिएको र दैनिक गतिविधिमा समेत बाधा पुगेको गुनासो बढ्दै गएपछि प्रहरीले तीव्र खोजी गरी नियन्त्रण गर्ने अभियान चलाएको थियो।
कलैया उपमहानगरपालिकाको वातावरण तथा विपद् व्यवस्थापन शाखा र जिल्ला प्रहरी कार्यालय बाराको संयुक्त टोलीले पाँच दिनको अथक प्रयासपछि उक्त कुकुरलाई नियन्त्रणमा लिन सफल भएको हो।
प्रहरी निरीक्षक खेम प्रसाद नेपालले कुकुर नियन्त्रणमा आएसँगै स्थानीयवासी त्रासमुक्त भएको बताए। उनले भने, “यो कुकुरले ठूलो क्षेत्रमा आतंक मच्चाएको थियो। हाम्रो टोलीले निरन्तर खोजी गरी नियन्त्रणमा लियो। अब स्थानीयवासी ढुक्क भएर हिँडडुल गर्न सक्छन्।”
जिल्ला प्रहरी कार्यालय बाराले स्थानीयवासीलाई यस्ता घटनाबारे तुरुन्त जानकारी दिन आग्रह गरेको छ। साथै, प्रहरीले यस्ता जोखिमपूर्ण अवस्थालाई नियन्त्रण गर्न सधैं तयार रहेको प्रतिबद्धता व्यक्त गरेको छ। स्थानीय प्रशासन र प्रहरीको सक्रियताले समुदायमा सुरक्षा र विश्वास बढाएको छ।
