काठमाडौँ । राष्ट्रपति रामचन्द्र पौडेलले विघटित प्रतिनिधिसभामा प्रतिनिधित्व गर्ने राजनीतिक दलहरू र सरकारसँग आगामी निर्वाचनको तयारीका विषयमा छलफल गर्ने भएका छन्।
राष्ट्रपति कार्यालय शीतल निवासमा शुक्रबार दिउँसो यो छलफल आयोजना गरिएको राष्ट्रपति कार्यालयले जनाएको छ।
सरकारले आगामी फागुन २१ गतेका लागि प्रतिनिधिसभा निर्वाचनको मिति घोषणा गरे पनि, निर्वाचनका मुख्य सरोकारवाला राजनीतिक दलहरूसँग पर्याप्त संवाद नभएको अवस्थामा राष्ट्रपतिले यो पहलकदमी लिएका हुन्।
राष्ट्रपति निकट स्रोतका अनुसार, बिहीबार प्रधानमन्त्री सुशीला कार्की र मन्त्रीहरूसँगको भेटपछि राष्ट्रपति पौडेल दलहरूसँग छलफल गर्ने निष्कर्षमा पुगेका थिए।
भेटका क्रममा राष्ट्रपति पौडेलले प्रधानमन्त्री कार्की र मन्त्रीहरूसँग पनि निर्वाचनको तयारीबारे चासो राख्दै त्यसका लागि सबै राजनीतिक दलहरूसँग संवाद र पहल गर्न सुझाएका थिए।
त्यसपछि प्रधानमन्त्री कार्कीले निर्वाचनको वातावरण बनाउन दलहरूसँग संवादको पहल गरिदिन राष्ट्रपति पौडेललाई नै अनुरोध गरेपछि राष्ट्रपतिले आजका लागि बैठक बोलाएको बताइएको छ। यो बैठकलाई आगामी निर्वाचनको तयारी र त्यसको सर्वस्वीकार्यताका लागि महत्त्वपूर्ण कदमको रूपमा हेरिएको छ।
