वीरगन्ज । पर्सा जिल्लामा असोज १८ र १९ गते परेको अविरल वर्षा र त्यसबाट सृजित डुबानको जोखिममा फसेका कैदी, स्थानीय बासिन्दा र पशु चौपायालाई सशस्त्र प्रहरी बल, नेपालले तत्कालै सकुशल उद्धार गरेको छ।
सशस्त्र प्रहरी बल, नेपाल नं. १३ गण हेड क्वाटर पर्साले उद्धार, राहत र सडक सुचारु गर्ने कार्य गरेको सूचना अधिकारी सशस्त्र प्रहरी नायव उपरीक्षक सुरज कार्कीले जानकारी दिए ।
उनका अनुसार असोज १८ गते, सशस्त्र प्रहरी बल, नेपाल नं. १३ गण हेड क्वाटर पर्सा मातहतको कारागार सुरक्षा बेस वीरगन्जको सहयोगमा वीरगन्ज कारागार कार्यालयको बन्दी सुधार गृहमा जमेको पानी मोटर लगाएर फालिएको थियो।
पानी जमेपछि असहज बनेको वातावरणलाई सहज बनाइएको थियो। सोही दिन, सशस्त्र प्रहरी बल, नेपाल सुरक्षा बेस पोखरियाबाट खटिएको टोलीले पोखरिया नगरपालिका–२, लमहरियामा पानी निकास हुन नसक्दा डुबानमा परेका करिब १०/१२ घरका १५÷२० जना व्यक्तिलाई उद्धार गरी नजिकैका आफन्तको घरमा सुरक्षित स्थानान्तरण गरेको थियो।
त्यस्तै असोज १९ गते, गणबाट खटिएको उद्धार टोलीले वीरगन्जका विभिन्न वडामा डुबानमा परेका परिवारको उद्धार गरेको सूचना अधिकारी सशस्त्र प्रहरी नायव उपरीक्षक कार्कीले बताए ।
वीरगन्ज–१६, भुटनदेवी मन्दिर नजिक घर वरिपरि करिब ७/८ फिट पानी जमेपछि घर भत्किने जोखिममा रहेका दीपक श्रीवास्तवको चार जनाको परिवारलाई सकुशल उद्धार गरी छिमेकीको घरमा सुरक्षित सारिएको छ।
यस्तै, वीरगन्ज–१३, राधेमाईमा ज्वरोले बिरामी भएकी र डुबानका कारण अस्पताल जान नसकेकी रिज्वान खातुनलाई सशस्त्र प्रहरी निरीक्षक जितेन्द्र कुमार साहको कमान्डमा खटिएको १६ जनाको टोलीले उद्धार गरी अस्पताल पुर्याएको थियो।
यसका साथै वीरगन्ज–११, विद्यापति नगरका सात जनाको परिवारलाई पनि सुरक्षित स्थानमा स्थानान्तरण गरिएको प्रवक्ता कार्कीले जानकारी दिए ।
यसैबीच, अविरल वर्षाका कारण सिर्सिया खोलामा पानीको बहाब बढेपछि वीरगन्ज–२४, रामगढवा स्थित वीरगन्ज गौशाला गाई फर्म डुबानमा परेको थियो।
फर्मभित्र करिब ३ फिट पानी पसेर फसेका १३२ वटा गाईहरूलाई सशस्त्र प्रहरी निरीक्षक दीपेन्द्र प्रकाश मल्लको नेतृत्वको १७ जनाको टोलीले सकुशल उद्धार गरी सुरक्षित स्थानमा सारेको सशस्त्र प्रहरीले जनाएको छ ।
उद्धार कार्यसँगै असोज १८ गते, पर्सा, बिन्दवासिनी गाउँपालिका–२, गर्दौल स्थित वीरगन्ज(पोखरिया सडक खण्डमा ढलेको रूखलाई सुरक्षा बेस बहुअर्वाभाठ्ठाबाट खटिएको टोलीले हटाई बाटो सुचारु गराएको पनि सूचना अधिकारी सशस्त्र प्रहरी नायव उपरीक्षक सुरज कार्कीले जानकारी दिए ।
