वीरगन्ज । मधेस प्रदेशमा पछिल्लो तीन आर्थिक वर्षमा दर्ता भएका विभिन्न प्रकृतिका मुद्दाहरूको त्रिवर्षीय विश्लेषणले सामाजिक अपराध र संगठित तथा आर्थिक अपराधहरू बढी भएको देखाएको छ।
प्रदेश प्रहरी कार्यालय वीरगन्जमा मुद्दा दर्ता भएको आधारमा गरिएको विश्लेषणले सामाजिक र संगठित तथा आर्थिक अपराधका घटना बढी भएको पाईएपनि हरेक बर्ष घट्दो क्रममा रहेको देखाएको छ ।
नेपाल प्रहरी मधेस प्रदेश कार्यालयको तथ्यांक अनुसार सामाजिक अपराधमा आर्थिक वर्ष २०७९/०८० मा तीन हजार ३० वटा मुद्दा दर्ता भएकोमा आ.ब.०८०/०८१ मा दुईहजार ६ सय ७३ वटा मुद्दा दर्ता भएका छन् । आर्थिक बर्ष ०८१/०८२ मा त्यो संख्या घटेर दुईहजार ८१ मा आएको छ ।
त्यस्तै मधेस प्रदेशमा संगठित तथा आर्थिक अपराध भने बढ्दो क्रममा रहेको छ । तथ्यांक अनुसार संगठित तथा आर्थिक अपराधका घटनाहरु आर्थिक वर्ष २०७९/०८० मा दुईहजार ८० दर्ता भएकोमा आ.ब. ०८०/८१ मा थोरै घटेर दुईहजार ६६ भएपनि आ.ब. ०८१/०८२ मा भने बढेर दुईहजार तीनसय ५६ पुगेको छ ।
त्यस्तै ज्यान सम्बन्धी अपराधको घटनामा पनि बढेको पाईएको छ । मधेस प्रदेशमा आर्थिकबर्ष ०७९/८० मा एक हजार एकसय २६ घटना दर्ता भएकोमा आ.ब.०८०/०८१ मा एक हजार दुईसय ५७ पुगेको थियो । आ.ब. ०८१/०८२ मा यो संख्या बढेर एक हजार तीनसय ९१ मा पुग्यो ।
आत्महत्याको घटनामा भएको वृद्धिले पनि समाजलाई चिन्तित बनाएको छ । मधेस प्रदेशमा आ.ब.०७९/०८० मा एक हजार एकसय ३६ वटा घटना दर्ताको भएको छ । आ.ब. ०८०/०८१ मा एक हजार दुईसय ८९ र आ.ब. ०८०/८१ मा आत्महत्याको घटना बढेर एक हजार दुईसय ५४ पुगेको छ ।
त्यसैगरी महिला बालबालिका तथा ज्येष्ठ नागरिक सम्बन्धी घटना भने प्रत्येक आ.ब.मा क्रमशः घटेको पाईएको छ । तथ्यांक अनुसार आ.ब.०७९/०८० मा पाँचसय ३४ घटना दर्ता भएको थियो । आ.ब.०८०/०८१ मा पाँचसय ११ र आ.ब. ०८१/०८२ मा चारसय ९१ मात्रै मुद्दा दर्ता भएको छ । यसले महिला बालबालिका तथा ज्येष्ठ नागरिकमाथि हुने आपराधिक क्रियाकलाप घटेको देखाएको छ ।
मधेस प्रदेशमा चोरी सम्बन्धी अपराध पनि कम भएको देखाएको छ । आ.ब.०७९/८० मा मधेस प्रदेशमा ६७९ चोरीका घटना रहेकोमा आ.ब.०८०/८१ मा ५४४ र आ.ब.०८१/८२ मा ४३४ वटा मात्रै घटना दर्ता भएका छन् ।
त्यस्तै विविध अपराध अन्तर्गत आर्थिक बर्ष ०७९/०८० मा ४३४, आ.ब. २०८०/०८१ मा ४९१, र आ.व. २०८१/०८२ मा ६३८ मुद्दा दर्ता भएका छन्। नेपाल प्रहरी मधेस प्रदेश कार्यालयको त्रिवर्षीय विश्लेषणले मधेस प्रदेशमा अपराधको प्रवृत्ति कुनैमा घटेको देखाएको छ भने, कुनैमा बढ्दै गएको पनि देखाएको छ ।
ज्यान, आत्महत्या र चोरीका घटनाहरूमा निरन्तर वृद्धिले समाजमा सुरक्षाको चुनौती बढेको देखाएको हो । यी तथ्यांकहरूले कानून कार्यान्वयन निकायहरू र नीति निर्माताहरूलाई अपराध नियन्त्रणका लागि थप प्रभावकारी रणनीतिहरू अपनाउनुपर्ने आवश्यकता औंल्याउँनुका साथै सामाजिक र आर्थिक समस्याहरूलाई सम्बोधन गर्न पनि विशेष ध्यान दिनुपर्ने दबाव बढेको छ ।
