काठमाडौं। त्रिभुवन अन्तर्राष्ट्रिय विमानस्थलबाट विदेश जाने यात्रुहरूले अब अध्यागमन जाँचका लागि उडान समयभन्दा कम्तीमा एक घण्टा अगाडि नै पुग्नुपर्ने भएको छ। अध्यागमन विभागले यात्रुको अत्यधिक चाप र कागजात परीक्षणमा सहजता ल्याउन यो नयाँ नियम लागू गरेको हो।
विभागका महानिर्देशक रामचन्द्र तिवारीले रातिको समयमा खाडी मुलुक जाने यात्रुहरूको संख्या धेरै हुने र अन्तिम समयमा जाँच गर्दा समस्या हुने भएकाले यो कडाइ गरिएको बताए। ूअन्तिम समयमा जाँच डेस्क अफिसरलाई समेत चेकजाँच गर्न कठिनाइ हुने हुँदा यसमा कडाइ गरिएको हो,ू उनले भने।
यस विषयमा अध्यागमन विभागले गत शुक्रबार नै विमानस्थलमा खटिने सबै एयरलाइन्स कम्पनीसहित सरोकारवाला निकायहरूसँग छलफल गरेको थियो। छलफलपछि नै यो निर्णय लिइएको हो।
यो निर्णय अध्यागमन विभागमा भएको नेतृत्व परिवर्तनपछि आएको हो। विमानस्थल अध्यागमनका कर्मचारीको मिलेमतोमा संगठित गिरोहले नेपाली युवाहरूलाई अवैध रूपमा विदेश पठाउने गरेको विषयमा अख्तियार दुरुपयोग अनुसन्धान आयोगले छानबिन गरिरहेको छ। यसै मामिलामा तत्कालीन विमानस्थल प्रमुख सहसचिव तीर्थराज भट्टराई पक्राउ परेपछि गृह मन्त्रालयले नयाँ नेतृत्व पठाएको थियो।
भिजिट भिसामा असुली गरी विदेश पठाउने क्रम नरोकिएपछि गृह मन्त्रालयले विमानस्थल अध्यागमनमा नरहरि घिमिरे र अध्यागमन विभागको महानिर्देशकमा रामचन्द्र तिवारीलाई पठाएको थियो। उनीहरूले अध्यागमनको व्यवस्थापनमा सुधारका लागि विभिन्न कदम चालिरहेका छन्।
यात्रुको चाप व्यवस्थापनका लागि नागरिक उड्डयन प्राधिकरणलाई रातिको उडान तालिकालाई थप लचिलो बनाएर पछाडि सार्न पनि आग्रह गरिएको छ।
